Sky News skýrir frá þessu. Fram kemur að Biden segi að starfsfólk hans, sem vinnur að undirbúningi innsetningar hans í forsetaembætti, fái ekki enn þær upplýsingar um varnarmál og þjóðaröryggismál sem það hafi þörf fyrir.
„Við höfum upplifað að pólitískir leiðtogar varnarmálaráðuneytisins hafa hindrað þetta. Staðreyndin er sú að margar af þeim stofnunum sem skipta miklu fyrir öryggi okkar hafa orðið fyrir miklum skaða. Margar þeirra hafa verið holaðar að innan hvað varðar starfsfólk, getu og starfsanda,“ er haft eftir Biden.
Það að verðandi forseti fái upplýsingar hvað varðar öryggismál landsins er venja sem hefur skapast og er gert með samþykki sitjandi forseta. En Trump þráast enn við að viðurkenna ósigur sinn í forsetakosningunum og reynir hvað hann getur til að halda örvæntingarfullt í forsetastólinn. En þrátt fyrir allar ásakanir og samsæriskenningar Trump, sem engin fótur hefur reynst fyrir, hefur kjörmannaráðið staðfest sigur Biden en það kaus hann forseta á fundi sínum um miðjan mánuðinn og mun Biden taka við embætti þann 20. janúar næstkomandi.
