Spennustigið á milli ríkisstjórnarflokkanna er nú mjög hátt og töluverðrar taugaveiklunar gætir á Alþingi. Spennan er að sögn annars vegar tilkomin vegna jólastress í þinginu og hins vegar vegna mikillar þreytu sem er komin í stjórnarsamstarfið. Þreytunnar gætir þó meira í þingliðinu en meðal ráðherra ríkisstjórnarinnar.

Fréttablaðið skýrir frá þessu í dag. Fram kemur að fleiri efist nú um að framhald verði á stjórnarsamstarfinu að kosningum loknum og hefur sú skoðun að sögn verið viðruð að slíta eigi samstarfinu fyrir lok kjörtímabilsins.

Mikil togstreita er sögð vera á milli ráðuneyta vegna fjárlagavinnu, einkum á milli heilbrigðisráðherra sem vill auka framlög til heilbrigðiskerfisins um tugi milljarða og fjármálaráðherra sem hafnar því.

Auk togstreitu um fjárlögin hafa ráðherra áhyggjur af málastöðunni og óttast að koma sínum málum ekki í gegnum ríkisstjórnina og þingflokkana í vetur. Þetta veldur spennu á milli ráðherra og þingmanna stjórnarmeirihlutans.

Nánar er hægt að lesa um málið í Fréttablaðinu í dag.