Í minnisblaði sem Bjarni Benediktsson, fjármálaráðherra, kynnti í ríkisstjórn í gær kemur fram að að sífellt stærri hluti verðmætasköpunar þjóðarinnar renni til tilfærslukerfa og fjárframlaga ríkissjóð en um fjórðungur allra skatttekna fer nú í almannatryggingakerfið. Hafa þessi framlög nær tvöfaldast frá 2013.

Morgunblaðið skýrir frá þessu í dag. Haft er eftir Bjarna að þetta sé þróun sem hafi átt sér stað jafnt og þétt í takt við mannfjölda en útgjöldin hafi snarhækkað.

„Við höfum verið að styrkja þessi kerfi, og þau hafa fylgt launaþróun í landinu, en við höfum hækkað launin undanfarinn áratug meira en nokkurt annað land OECD. Þess vegna skýtur skökku við að heyra suma tala um skerðingar í þessu samhengi, þegar allar tölur sýna hið gagnstæða,“

er haft eftir honum. Hann sagði jafnframt að þjóðin sé að eldast og það hafi mikil áhrif.

„Við viljum ræða við vinnumarkaðinn um heildarendurskoðun á lífeyriskerfinu, þar á meðal hækkun lífeyristökualdurs í áföngum. Það má öllum vera ljóst að þessi vöxtur er ekki sjálfbær. Það er mjög sláandi þegar ¼ teknanna fer í málaflokk, sem hefur verið í 14-15%,“

sagði hann einnig.