Þórhildur Sunna Ævarsdóttir, þingmaður Pírata gagnrýndi meðferð ríkisstjórnarinnar á egypsku Kehdr fjölskyldunni, í ræðu sinni á Alþingi í kvöld. Líkt og flestir muna fékk Kehdr fjölskyldan dvalarleyfi hér á landi eftir að hafa verið í felum svo dögum skipti, frá stjórnvöldum sem ætluðu að vísa henni úr landi. Þórhildur segist spyrja sig hvers vegna örlög fjölskyldunnar hafi ekki skipt Katrínu Jakobsdóttur, forsætisráðherra neinu máli.

„Þegar forsætisráðherra sagði í stefnuræðu sinni, að þó að hlutverk stjórnmálamanna sé fyrst og fremst að hugsa um samfélagið sem heild, þá skipti máli að hugsa um örlög hvers og eins, þá hljótum við að spyrja okkur hvers vegna örlög egypsku barnanna sem vísa átti úr landi skiptu hana engu máli.

Því þegar hún var spurð um örlög þessara barna sagði hún að hún skipti sér ekki af einstaka málum, að þetta væri nú ekki fyrsta brottvísunin, að við tækjum nú ekki á móti öllum börnum sem hingað leita að vernd. Verkefni stjórnmálamanna sé að byggja upp mannúðlegt kerfi frekar en að grípa inn í einstök mál.

En eina framlag hennar til þessa “mannúðlega kerfis” eru síendurteknar og ómannúðlegar tilraunir til að veikja réttarstöðu flóttamanna og auðvelda brottvísanir þeirra – líka barna. Tilraunir, sem við Píratar höfum þurft að stöðva aftur og aftur með mikilli fyrirhöfn.“

Þá skaut Þórhildur á þingmenn Sjálfstæðisflokksins, annars vegar Ásmund Friðriksson, sem skrifaði færslu um hælisleitendur á dögunum sem fékk á sig mikla gagnrýni. Og hins vegar Kristján Þór Júlíusson, sjávarútvegsráðherra, sem hefur verið gagnrýndur fyrir að tengjast útgerðarfyrirtækinu Samherja.

„Má ég þá frekar biðja um að stjórnarliðið geri sem minnst, eins og þau gera í hvert einasta skipti sem útkeyrður þingmaður þeirra í Suðurkjördæmi hjólar í hælisleitendur á Facebook.

Kannski voru stærstu mistök egypsku barnanna að hafa ekki bara sent tölvupóst á hv. sjávarútvegsráðherra, hann virðist ekki hika við að beita sér í einstaka málum og redda reglugerðum fyrir ráðvillta hvalveiðimenn. Eða kannski voru stærstu mistök þeirra að vera bara börn, en ekki moldríkir útvegsmenn sem greiða hámarksstyrki til Sjálfstæðisflokksins.“