Ágúst Ólafur Ágústsson, þingmaður Samfylkingarinnar, hefur ekki mikið álit á ríkisstjórninni. Hann setur fram sjö fullyrðingar um verk hennar á kjörtímabilinu, sem hann telur við hæfi á þessum degi:
„Þegar vel gengur er ríkisstjórnin ekki lengi að þakka sér fyrir það. Og með þeim rökum má alveg benda á ábyrgð þessarar sömu ríkisstjórnarinnar þegar illa gengur. Og úr því þriðji mánudagur janúarmánaðar hefur álitinn sem mest niðurdrepandi dagur ársins er kannski ráð að líta á sjö deprimeraða punkta“
segir Ágúst og setur fram eftirfarandi punkta:
- Yfir 8.000 manns eru nú atvinnulaus og hefur hlutfall þeirra aukist um helming síðan þessi ríkistjórn tók við völdum. Þessi fjöldi atvinnulausra er hærri en íbúafjöldi Vestfjarða.
- Hagvöxtur er horfinn og er samdráttur hafinn á vakt þessarar ríkisstjórnar. Sveiflan á ríkissjóði á síðasta ári varð 43 milljarðar kr. til hins verra.
- Starfsfólk Landspítalans hefur lýst yfir „neyðarástandi“ og standa núna yfir „umfangsmiklar aðhaldsaðgerðir á Landspítalanum“ að sögn forstjóra spítalans.
- „Allir málaflokkar sem varða fatlað fólk og örorkulífeyrisþega eru sveltir.“ Þetta er bein tilvitnun í umsögn Öryrkjabandalagsins um nýjasta fjárlagafrumvarp þessarar ríkisstjórnar.
- Framhaldsskólar fá minna fjármagn árið 2020 en það sem þeir fengu í fyrra.
- Veiðileyfagjöld hafa lækkað um meira en helming síðan þessi ríkisstjórn tók við og ná þau ekki lengur að dekka þann kostnað sem almenningur verður fyrir vegna stórútgerðarinnar.
- Ríkisstjórnin setur sérstaka aðhaldskröfu á spítala, skóla og hjúkrunarheimili í nýjustu fjárlögunum sínum.
Við getum gert svo miklu betur og vonandi mun það sjást í næstu kosningum,“
segir Ágúst að lokum.
