Helga Vala Helgadóttir, þingmaður Samfylkingarinnar, bendir á að í forsíðufrétt Fréttablaðsins í dag, sem og í umfjöllun Morgunblaðsins undanfarið um málefni Samherja, hafi það gleymst að stórfyrirtækið var í reynd ekki sýknað af ásökunum í Seðlabankamálinu. Þetta kemur fram á Facebook-síðu Helgu.

Helga Vala kveðst ánægð með afdráttarlausan stuðning RÚV við fréttamanninn Helga Seljan sem borinn var þungum sökum í nýjum þætti Samherja um Seðlabankamálið sem birtist á RÚV í dag. Þar var það gert að umfjöllun að rannsókn Seðlabankans á Samherja hefði grundvallast á gögnum sem Helgi Seljan hefði átt við eða falsað. RÚV hafnar alfarið þessum ásökunum.

Hins vegar vill Helga Vala einnig minna á að ástæða þess að Samherji var ekki sakfelldur fyrir brot gegn gjaldeyrislögum var ekki sú að enginn fótur hafi reynst fyrir ásökununum.

„Ég minni lesendur á að Hæstiréttur sýknaði ekki Samherja af ásökunum heldur snerist niðurstaðan um lagatæknileg atriði. Galla við lagasetningu og það að Seðlabankinn hafði, eftir að hafa sent málið til sérstaks saksóknara, lýst því yfir við Samherja að bankinn hefði ekki mál Samherja til meðferðar hjá sér lengur.

Þegar saksóknari benti á að lagastoð skorti til álagningu sektar vegna brotanna, vegna mistaka við lagasetningu, og sagði þeim að bankinn þyrfti að beita stjórnvaldsákvörðun í staðinn, þá var það óheimilt þar sem bankinn hafði lýst því yfir að málið væri ekki hjá þeim heldur saksóknara.

Um þetta snýst þessi dómur,[…] Þetta „gleymist“ alfarið í umfjöllun fréttablaðsins og morgunblaðsins um málið.“