Dagur B. Eggertsson, borgastjóri, skrifar um kjaradeilurnar við Eflingu á Facebooksíðu sína í dag. Hann segir að svo virðist sem ekki allir átti sig á því hversu góður samningur sé í boði og spyr hvers vegna samningar sem 18 félög innan SGS samþykktu í gær, njóti svo sterks stuðnings:

„Þeir sem ég hef heyrt í telja að það sé vegna þess að krónutöluhækkanir upp á 90.000 kr. ofan á grunntaxta hafi skipt þar mestu máli. Þar með eru allra lægstu laun í grunninn orðin um 400.000 kr. á mánuði. Mér finnst mikilvægt að efni þessara samninga verði miklu betur kynnt.“

segir Dagur, en Efling er eina félagið innan SGS sem ekki hefur samþykkt samninginn og hefst þriggja daga verkfall um 1800 félagsmanna Eflingar í Reykjavík í hádeginu í dag.

„Samningar Starfsgreinasambandsins byggja algjörlega á lífskjarasamningnum sem er einnig grunnurinn í tilboði borgarinnar til Eflingar. Stundum efast ég um að allir átti sig á þessari 90.000 kr. hækkun á grunntaxtana og að lífskjarasamningarnir feli í sér um 30% hækkun grunnlauna hjá lægstu hópunum hjá borginni. Samt tala sumir einsog tilboðið mæti ekki hagsmunum þeirra sem eru á lægstu laununum,“

segir Dagur og beinir orðum sínum augljóslega að Sólveigu Önnu Jónsdóttur, formanns Eflingar.

Hann segir mikilvægt að efni samninganna verði kynnt betur:

„Sem dæmi væru ófaglærðir deildarstjórar á leikskólum komnir með um 520 þúsund á mánuði að meðaltali í lok samningstímans. Þetta eru samningar um hækkun lægstu launa. Þeir sem hærri eru fá lægri krónutölu.“