Deilur Eflingar og Reykjavíkurborgar hafa varla farið framhjá mörgum, en ekkert gengur í kjaraviðræðum og stefnir í verkfall 1800 félagsmanna Eflingar sem vinna hjá borginni, í byrjun febrúar.
Harpa Ólafsdóttir, formaður samninganefndar Reykjavíkurborgar, segir að Sólveig Anna Jónsdóttir, formaður Eflingar, fari með ósannindi í fjölmiðlum.
Sólveig fullyrti í Morgunútvarpi Rásar 2 í morgun að bogin hefði aðeins lagt fram eitt tilboð í upphafi viðræðna fyrir 10 mánuðum, sem hafi verið verra en lífskjarasamningurinn svokallaði.
Þessu vísar Harpa á bug, því tilboðið hafi verið betra en lífskjarasamningarnir, ef eitthvað er:
„Við lögðum fram megináherslu sem kvað á um það að við myndum fylgja Lífskjarasamningnum og það er það tilboð sem við höfum lagt fram, og ef eitthvað er, er kannski örlítið meira.“
Ekki er vitað hverjar kröfur Eflingar eru, eða hvert tilboð Reykjavíkurborgar var, nema að Efling heimtaði 400 þúsund króna desemberuppbót, sem er um 300% hækkun frá síðustu desemberuppbót, sem er um 97 þúsund krónur. Önnur félög innan SGS sömdu um hækkun desemberuppbótar og er hún nú 120 þúsund krónur.
Sólveig hefur sakað samninganefnd Reykjavíkurborgar um virðingaleysi og dregið borgarstjóra til ábyrgðar. Vill hún að viðræður fari fram fyrir opnum tjöldum, því Efling hafi ekkert að fela. Vill hún að borgarstjóri komi sjálfur að viðræðunum.
Harpa vill hinsvegar lítið tjá sig um upplifun Sólveigar af fundum, heldur bendir á að viðræður séu á viðkvæmu stigi og það gagnist lítið að munnhöggvast í fjölmiðlum.