Óttast um líf sitt

„Samtökin ‘78 og Reykjavik Pride lýsa yfir djúpstæðum áhyggjum af því eldfima ástandi sem skapast hefur fyrir hinsegin fólk í Póllandi. Á síðustu mánuðum hefur andúð á hinsegin fólki náð áður óþekktum hæðum fyrir tilstilli ríkisstjórnar landsins, margra sveitar- og borgarstjórna og kaþólsku kirkjunnar. Stjórnmálafólk og trúarleiðtogar hafa nýtt dagskrárvald sitt til þess að viðhafa hatursfull ummæli og ýta undir ranghugmyndir um hinsegin fólk.“

Er hatrið sagt hafa fengið byr undir báða vængi í Póllandi:

„Margt hinsegin fólk í Póllandi óttast nú um líf sitt og framtíð. Hættuleg orðræða valdafólks sem tengist kosningabaráttu stjórnarflokksins Laga og réttlætis, fyrst fyrir Evrópuþingskosningar í vor og nú í aðdraganda þingkosninga sem fram fara í haust, hefur gefið hatri á hinsegin fólki byr undir báða vængi. Á síðustu dögum og mánuðum hafa óhugnanlegar fréttir borist frá landinu. Tugir pólskra borga hafa lýst því yfir að þær séu lausar við ‘hinsegin hugmyndafræði’. Vikublaðið Gazeta Polska hefur sent út límmiða sem lesendur geta nýtt til merkingar á ‘hinseginlausum svæðum’. Á laugardaginn beittu mótmælendur hinsegin fólk grófu ofbeldi í gleðigöngu í borginni Bialystok, þeirri fyrstu sem skipulögð er þar í borg. Ljóst er að hinsegin fólk í Póllandi býr við verulega ótryggt ástand, aukna jaðarsetningu og hættu á ofsóknum.“

Ekki einkamál þjóðar

„Baráttusystkinum okkar í Póllandi og pólskum bandamönnum þeirra hér á landi sendum við okkar bestu baráttukveðjur. Mannréttindi og brot á þeim eru ekki einkamál þjóða heldur þarf alþjóðasamfélagið allt að sýna aðhald og senda sterk skilaboð. Við stöndum með ykkur!“