Guðlaug Rakel Guðjónsdóttir, framkvæmdastjóri flæðisviðs Landspítalans og staðgengill forstjóra, segir við mbl.is að rekstrarhallinn á Landspítalanum sé umfram spár fyrir árið 2019:
„Hallinn er umtalsverður og eitthvað umfram spár, en við erum að vinna að tillögum og útfærslu þeirra út af hallarekstri með heilbrigðisráðuneytinu.“
Svandís Svavarsdóttir vildi ekki tjá sig um umfangið, en sagði að mikil samskipti væru á milli ráðuneytisins og spítalans vegna málsins:
„Það er alltaf þannig að gaumgæfilega er fylgst með rekstri stofnanna og tiltekið ferli sem þar er viðhaft í samskiptum við ráðuneytið, þannig að ráðuneytið er upplýst með mjög reglubundnum hætti um hver staðan er. Þegar stefnir í halla eða þá að hann er sýnilegur þýðir að það er enn betur farið í saumana á málunum, bæði óskað skýringa og það að viðkomandi stofnun hafi einhverjar leiðir til að ná rekstrinum aftur á kjöl.“
Hallarekstur Landspítalans nam 1.4 milljarði í fyrra, um 2% miðað við tekjur, sem voru 70.8 milljarðar árið 2018.
