Samkvæmt Facebookpistli Sólveigar Önnu Jónsdóttur, formanns Eflingar, voru tveir stjórnarmenn í Eflingu reknir úr starfi sínu vegna þátttöku sinnar í verkalýðsbaráttunni. Vísir greinir frá og hefur eftir Viðari Þorsteinssyni, framkvæmdastjóra Eflingar, að þetta sé rétt hjá Sólveigu:

„Ég get staðfest það að stjórnarmenn hjá okkur, sem voru kosnir í stjórn í Eflingu fyrir ári, hefur ýmist verið sagt upp eða neitað um vaktir. Það er ályktun okkar að það sé ekki tilviljun,“

segir Viðar, en vill ekki nafngreina hvaða einstaklingar eða fyrirtæki ættu í hlut.

Í pistli Sólveigar segir:

„Við í Eflingu vorum í samningaviðræðum fram á síðustu stundu. Á lokametrunum náðum við td. inn ákvæði um að atvinnurekendur eigi að sjá fyrir túlkun þegar miðla þarf mikilvægum upplýsingum til starfsfólks, ef að íslenskukunnátta er ekki fyrir hendi og við náðum inn bókun um aukna vernd fyrir þau sem taka þátt í stéttabaráttu með sínu félagi. Bæði þessi atriði eru mjög mikilvæg; ég hef setið á fundi sem fulltrúi Eflingar þar sem tilkynnt var um fjöldauppsögn á íslensku, þrátt fyrir mikinn fjölda starfsmanna af erlendum uppruna og engin tilraun gerð til að túlka það sem fram fór og tveir af stjórnarmeðlimum Eflingar misstu vinnuna vegna aktívrar þátttöku í starfi félagsins.“