Íslenska flugmannafélagið (ÍFF) sem er stéttarfélag flugmanna WOW air, fór fram á í bréfi til formanns Blaðamannafélags Íslands, að rannsökuð yrði heimildaöflun blaðamanna sem fjallað hefðu um WOW, vegna „óvæginnar umfjöllunar íslenskra fréttamiðla.“

ÍFF gaf í skyn að íslenskir blaðamenn fjölluðu um WOW á sérlega óvæginn hátt þar sem þeir hefðu mögulega þegið frímiða, sporslur og hlunnindi frá Icelandair og var óskað eftir rannsókn á slíkum hlunnindum.

Hvergi í bréfinu er tilgreint um hvaða fréttir er að ræða, frá hvaða fjölmiðli eða blaðamanni, eða hvort einhverjar rangfærslur hafi verið í fréttum af WOW air.

Fjarstæðukenndir órar

Formaður Blaðamannafélagsins, Hjálmar Sveinsson, hefur nú svarað bréfi ÍFF og birt á vefsíðu BÍ. Segir hann ásakanir ÍFF vera fjarstæðukennda óra:

„Það er ábyrgð blaðamanna að fjalla á gagnrýnin hátt um mikilvæg fyrirtæki í íslensku efnahagslífi, að ekki sé talað um flugfélög sem starfa á viðkvæmum neytendamarkaði. Það er skuldbinding blaðamanna gagnvart íslenskum almenningi.  Ég hef skilning á því að starfsmenn WOW air hafi áhyggjur af störfum sínum, en að rekja einhvern hluta af rekstrarvanda fyrirtækisins til umfjöllunar blaðamanna er að fara í geitarhús að leita ullar. Þarf ekki annað en horfa til umfjöllunar blaðamanna um Icelandair og erfiðleika þess félags, samkeppnisaðila WOW,  til að sjá hversu fjarstæðukennir órar eru á ferðinni í stjórn Íslenska flugmannafélagsins.“