Mannréttindadómstóll Evrópu mun kveða upp úrskurð sinn á morgun í Landsréttarmálinu svokallaða, þegar Sigríður Á. Andersen dómsmálaráðherra, skipaði 15 dómara við Landsrétt árið 2017. Skorið verður úr um hvort ákvörðun hennar um að virða að vettugi niðurstöðu hæfnisnefndar, standist lög og ákvæði mannréttindasáttmálans. Fréttablaðið greinir frá.

Fjórir dómarar sem hæfnisnefnd mat hæfa til starfans voru ekki skipaðir af Sigríði og tveir þeirra leituðu til Hæstaréttar vegna þessa. Komst Hæstiréttur að því að Sigríður hefði brotið stjórnsýslulög við að ganga framhjá dómurunum og fékk hvor um sig um 700 þúsund krónur í miskabætur.

Í kjölfarið leituðu hinir tveir dómararnir einnig réttar síns, þar sem íslenska ríkið var dæmt til að greiða þeim einnig skaða- og miskabætur.

Þegar Landsréttur tók til starfa lagði lögmaðurinn Vilhjálmur H. Vilhjálmsson fram þá kröfu fyrir hönd síns skjólstæðings, að einn dómari, Arnfríður Einarsdóttur, sem skipuð var af dómsmálaráðherra í stað eins ofangreindra fjórmenninga, yrði dæmd vanhæf vegna skipunarinnar. Þeirri kröfu var hafnað en var sú ákvörðun kærð til Hæstaréttar, sem staðfesti dóm Landsréttar. Því leitaði Vilhjálmur til Mannréttindadómsstólsins, sem úrskurðar um málið á morgun.

Sigríður var harðlega gagnrýnd í kjölfar niðurstöðu Hæstaréttar og þess krafist að hún segði af sér embætti vegna málsins, en stjórnarandstaðan lagði fram vantrauststillögu gegn henni, sem var felld.  Hefur Sigríður ekki sýnt af sér neitt fararsnið hingað til.

Sjá einnig: Sigríður Á. Andersen:„Sama hvað ég hefði gert, þetta hefði alltaf orðið mikið og umdeilt mál“

Sjá einnig: Stórisannleikur – Jón Steinar Gunnlaugsson

Sjá einnig:  Barátta um völd – Jón Steinar Gunnlaugsson