Fréttablaðið skýrir frá þessu í dag. Blaðið segir að meðlag sé greitt með 11.703 börnum og nema heildargreiðslurnar um 400 milljónum á mánuði miðað við september á þessu ári. Blaðið fékk upplýsingarnar frá lögmanni Innheimtustofnunar.
Á síðasta ári borguðu 53% meðlagsgreiðenda með einu barni, 28% með tveimur og 12% með þremur. Sá sem greiddi með flestum börnum var meðlagsskyldur með 11 börnum. Að vera meðlagsskyldur felur í sér að viðkomandi þarf að greiða meðlag með öllum börnum sínum undir 18 ára aldri. Útbreiddur misskiliningur er að aðeins þurfi að greiða meðlag með þremur börnum að hámarki.
Tólf prósent meðlagsgreiðenda eru erlendir ríkisborgarar eða 1.054 talsins. Rúmlega helmingur þeirra er búsettur hér á landi. Vanskil þessa hóps virðast hlutfallslega minni en heildarinnar að sögn lögmanns Innheimtustofnunar.
Meðlagsgreiðslur eru ekki afskrifaðar nema í undantekningartilfellum eins og við andlát og gjaldþrot meðlagsgreiðanda. Af þessum sökum hlaðast meðlagsgreiðslur upp í kerfi Innheimtustofnunar og eru ógreiddar meðlagsskuldir í gagnagrunni stofnunarinnar um 21 milljarður frá 1972 og fram til dagsins í dag.