Kjörnir fulltrúar Reykjavíkurborgar fá veglegt jólafrí frá fundarhöldum yfir hátíðarnar þar sem búið er að fresta tveimur borgarráðsfundum í desember og einum í janúar.

Mun borgarráð ekki funda fyrr en í janúar og eftir borgarstjórnarfundinn í dag verður sá næsti ekki á dagskrá fyrr en 21. janúar, en kosið verður um niðurfellinguna í dag, að sögn Vigdísar Hauksdóttur, borgarfulltrúa Miðflokksins, sem gagnrýnir þetta fyrirkomulag meirihlutans:

„Enn þverskallast meirihlutinn að byrja fundina að morgni til að spara útgjöld
Það eru ekki ný tíðindi – en: Borgin er skrúfuð niður í heilan mánuð í kringum jólin sem gerir okkur í minnihlutanum áhrifalaus – því:

Síðasti borgarráðsfundur var haldinn 5. desember. Búið er að fella niður tvo borgarráðsfundi í desember – en þeir áttu að vera 12. og 19. des. Næsti fundur borgarráðs verður fyrst 9. janúar 2020
Nú stendur til að fella niður borgarstjórnarfund sem vera átti 7. janúar 2020 og verður fyrsti fundur á nýju ári 21. janúar. Á meðan leika mýsnar sér – þegar kötturinn er hafður í mánaðarlöngu jólafríi.”