„Hvað ætli sé orðið um ungliðahreyfingar stjórnmálaflokkanna? Það heyrist nánast aldrei í þeim. Eru hefðbundin fundarhöld og umræður um þjóðmál liðin tíð hjá ungu fólki?“

Styrmir Gunnarsson, fyrrverandi ritstjóri Morgunblaðsins, veltir þessu fyrir sér á bloggsíðu sinni og bætir við að sárasjaldan heyrist til dæmis í Heimdalli FUS og Sambandi ungra sjálfstæðismanna. Það sama eigi við um ungliðasamtök annarra flokka.

Styrmir segir að þetta sé undarleg þverstæða því á sama tíma séu yngri kynslóðir komnar til meiri áhrifa í stjórnmálum almennt en fyrr á tíð.

„En um leið virðast hinir hefðbundnu flokkar hafa tapað miklu fylgi meðal yngri kjósenda. Það er t.d augljóst, að Sjálfstæðisflokkurinn þarf að gerasérstakt átak til þess að ná tilungra kjósenda, sem einu sinni voru einna sterkustu fylgismenn flokksins. Og þá mætti ætla að félagasamtök ungra sjálfstæðismanna hlytu að koma þar við sögu. Hvað ætli valdi þessu? Eru öll samskipti yngra fólks komin á netið?“