Bjarkey Olsen Gunnarsdóttir, þingmaður VG, segir að Andrés Ingi Jónsson hafi ekki gefið þingflokknum neinar skýrningar á því hvers vegna hann sagði sig úr þingflokki VG og flokknum. Andrés Ingi situr nú á Alþingi sem óháður þingmaður. Bjarkey segist vera ósammála þeim skýringum sem Andrés Ingi hefur gefið í fjölmiðlum, þar sem hann hefur gagnrýnt frammistöðu VG og ríkisstjórnarinnar í umhverfismálum og málefnum innflytjenda. Bjarkey segir að aldrei hafi verið gert eins mikið í umhverfismálum og í tíð þessarar ríkisstjórnar.

Þetta kom fram í umræðum í Silfrinu á RÚV í morgun.

Björt Ólafsdóttir, fyrrverandi umhverfisráðherra og fyrrverandi þingmaður Bjartrar framtíðar, taldi ríkisstjórnina ekki standa sig nægilega vel í umhverfismálum og tókst á við Bjarkey í þættinum um það. Hún sagðist virða það að þingmenn stæðu fastir á prinsippum sínum en sagði það vera reynslu Bjartrar framtíðar að fólk kysi ekki alltaf prinsippmanneskjur. Vísaði hún til þess að Björt framtíð sagði sig frá ríkisstjórnarsamstarfi fyrir tveimur árum vegna uppreistar æru málsins. Í kjölfarið þurrkaðist flokkurinn út í Alþingiskosningum.

Þorsteinn Víglundsson, þingmaður Viðreisnar, leiddi líkur að því að Andrési hefði misboðið hvað VG líður í rauninni vel í ríkisstjórnarsamstarfinu. Það sé ekki sá munur á VG og Sjálfstæðisflokki og látið sé í veðri vaka heldur séu flokkarnir sammála um mörg aðalatriði í íslenskum stjórnmálum, til dæmis kyrrstöðu í landbúnaðarmálum. Með þessu ríkisstjórnarsamstarfi taki landsbyggðaríhald höndum saman og í raun sé þetta samstarf framsóknarflokkanna þriggja, VG, Sjálfstæðisflokks og Framsóknarflokks.