Kjartan Þorkelsson, lögreglustjóri á Suðurlandi, mun gegna embætti ríkislögreglustjóra tímabundið í stað Haraldar Johannessen sem sagði upp störfum í dag. Áslaug Arna Sigurbjörnsdóttir dómsmálaráðherra tilkynnti þetta á blaðamannafundi sem haldinn var í Ráðherrabústaðnum við Tjarnargötu í hádeginu. Á fundinum sagði Áslaug að Kjartan hafi orðið fyrir valinu vegna árangurs hans og velgengni í starfi sem lögreglustjóri á Suðurlandi.

Áslaug Arna tilkynnti einnig um það á fundinum að hún hyggst stofna lögregluráð sem mun samanstanda af lögreglustjórum landsins en ríkislögreglustjóri verður formaður ráðsins. Áslaug sagði þetta ráð vera stofnað til að sporna gegn ósamrými innan lögreglunnar sem hún segir vera helsti valdur neikvæðrar umfjöllunar um lögregluna í fjölmiðlum. Haraldur Johannessen vakti til að mynda mikla athygli í haust. Mikið hafði gengið á innan lögreglunnar og ekki batnaði ástandið eftir viðtal Morgunblaðsins við Harald. Þar lýsti Haraldur meintri rógsherferð gegn sér, óhæfum starfsmönnum lögreglunnar og spillingu innan hennar.

Í kjölfarið lýstu átta af níu lögreglustjórum á Íslandi yfir vantrausti á Harald Johannessen ríkislögreglustjóra og töldu hann óstarfhæfan. Þar á meðal formaður Lögreglustjórafélagsins, Úlfar Lúðvíksson. Aðeins Ólafur Helgi Kjartansson á Suðurnesjum kaus að taka ekki undir yfirlýsinguna.

Kjartan, sem tekur nú við af Haraldi, var því á meðal þeirra sem töldu Harald óstarfhæfan og lýstu yfir vantrausti á hann í haust.