Miðflokkurinn birtir heilsíðuauglýsingu í Morgunblaðinu í dag hvar kallað er eftir reynslusögum frá almenningi. Segir Miðflokkurinn að það sé forgangsverkefni hjá honum að takast á við báknið:
„Hefur þú lent í „kerfinu“? Hefur þú mætt óbilgirni af hálfu hins opinbera? Hefur þú upplifað óeðlilegar hindranir stjórnkerfisins við stofnun eða rekstur fyrirtækis eða í daglegu lífi? Ef sú er raunin biðjum við þig að senda okkur reynslusögur á netfangið reynsla@midflokkurinn.is / Við biðjum ykkur um að hjálpa okkur við að greina eðli vandans svo við verðum betur í stakk búin til að leysa hann.“
Er tekið fram að gætt verði nafnleyndar, nema annað sé tekið fram.
Meðal stefnumála Miðflokksins samkvæmt auglýsingunni, eru:
„Markmiðið er að stuðla að betra lífi fyrir almenning, aukinni verðmætasköpun og því að ríkið geti betur nýtt peninga skattgreiðenda til að standa undir mikilvægri þjónustu.“
Flokksráðsfundur Miðflokksins verður haldinn næstu helgi í Reykjanesbæ og má gera ráð fyrir að auglýsingin sé einskonar upphitun fyrir hann. Hún er einnig í samræmi við þau 12 áhersluatriði flokksins sem tilkynnt var um í upphafi þings, en þar var „Báknið burt“ efst á blaði.
Það slagorð má hinsvegar rekja til Sjálfstæðisflokksins, þegar Eimreiðarhópurinn svokallaði braust fram á sjónarsviðið í nafni frjálshyggju, undir forystu Davíðs Oddssonar, en sá hópur varð síðar uppistaðan í forystu flokksins.
