Lögmaðurinn Jón Steinar Gunnlaugsson var sýknaður af meiðyrðakröfum Benedikts Bogasonar í Landsrétti á dögunum. Jón Steinar sagði í bók sinni Með lognið í fangið, að dómur sem Benedikt kom að í máli gegn Baldri Guðlaugssyni, sem dæmdur var fyrir innherjasvik í kjölfar hrunsins, hefði verið dómsmorð, en Benedikt taldi það ganga of nærri sér.

Hefur dómi Landsréttar verið áfrýjað til Hæstaréttar.

Alltaf staðið til

Jón Steinar skrifar í Morgunblaðið í dag, þar sem hann spáir um hvernig framhaldið verði. Hann segir það alltaf hafa verið tilganginn hjá Benedikt að koma málinu til Hæstaréttar, sem sé hans „yfirráðasvæði“:

„Nú hafa bæði héraðsdómur og Landsréttur sýknað mig af meiðyrðakröfum hæstaréttardómarans Benedikts Bogasonar. Þá birtist það sem alltaf hefur áreiðanlega staðið til. Hann ætlar að ná málinu inn á yfirráðasvæði sitt við Hæstarétt. Lögmaður hans hefur sagt opinberlega að nú verði sótt um áfrýjunarleyfi þangað.“

Jón Steinar segir það vekja furðu margra að Benedikt hafi höfðað málið, þar sem mörg dómafordæmi séu fyrir því að Jón Steinar hafi ekki misfarið með tjáningarfrelsi sitt í bók sinni, er hann talaði um dómsmorð:

„Það er ótrúlegt að löglærður maðurinn hafi ekki áttað sig á þessu. En hann hefur kannski bara séð lengra. Ef allt um þryti gæti hann komið málinu til Hæstaréttar þar sem hann hefur öll spil á hendi.

Spá mín um framhaldið er nokkurn veginn svona: Hann mun nú óska eftir áfrýjunarleyfi til Hæstaréttar. Til verða kvaddir þrír lögfræðingar úr vinahópi réttarins til að afgreiða óskina. Þeir munu auðvitað gera það sem þeim er ætlað og veita leyfið. Síðan verða kvaddir til fimm þekkilegir lögfræðingar til að dæma málið. Þeir munu ekki verða bundnir af lögfræði við sýslan sína heldur bara gera það sem til er ætlast af þeim. Fróðlegt verður að fylgjast með framvindunni í þessu.“