Íbúafjöldi Reykjavíkurborgar er rúmlega 126 þúsund manns. Hjá embætti umboðsmanns borgarbúa eru þrír starfsmenn, að umboðsmanninum meðtöldum, Inga B. Poulsen. Hlutverk embættisins er að leysa úr málum borgarbúa, sem eru jafn fjölbreytt og þau eru mörg, eins og gefur að skilja.
Aðspurður hvort embættið valdi starfi sínu með þeim starfsmannafjölda sem það hefur til að sinna þeim umkvörtunum sem það fær inn á borð til sín, segir Ingi:
„Að mínu mati hefur tekist vel til við að halda úti skilvirkri starfsemi hjá embættinu á algjörum lágmarksfjölda starfsmanna. Á embættinu er mikið álag sem hefur einnig gert það að verkum að embættið hefur tileinkað sér eins óformlega starfshætti sem kostur er enda er það skilvirkasta leiðin til að vinna úr málefnum borgaranna. Það er einnig í samræmi við þróun starfshátta sambærilegra embætta í öðrum löndum. Það er því erfitt að setja þetta í samhengi sem er samanburðarhæft þar sem ekkert annað sambærilegt embætti er til á landinu“
Að sögn Inga eru flestar kvartanir tengdar velferðarsviði Reykjavíkurborgar:
„Helst reynir þar á húsnæðismál og fjárhagsaðstoð. Í þeim tilvikum er yfirleitt verið að kvarta undan langri bið eftir úthlutun á félagslegu leiguhúsnæði. Næst á eftir koma mál sem varða umhverfis- og skipulagssvið, oftast mál sem snúa að gerð og framkvæmd á skipulagsáætlunum og málsmeðferð byggingarfulltrúa, svo sem við útgáfu byggingaleyfa. Þá hafa málefni bílastæðasjóðs yfirleitt verið þriðji stærsti flokkur þeirra mála sem berast umboðsmanni. Þau mál varða oftar en ekki lögmæti álagningar gjalda.“
Nánar verður fjallað um embætti borgrbúa á Eyjunni um helgina.
