Miðað við kynningu Íslenskra verðbréfa á flugfélaginu Play er gert ráð fyrir að félagið verði orðið arðbært á gífurlega skömmum tíma. Samkvæmt því sem í kynningunni eru kallaðar raunhæfar og frekar hóflegar áætlanir þá munu hluthafar fá 12 til 13 falda fjárfestingu sína til baka á þremur árum.
Þann 5. nóvember síðastliðinn var tilkynnt á stórum blaðamannafundi að nýtt flugfélag Play væri við það að fá flugrekstrarleyfi og hygðist hefja sölu á fyrstu ferðum núna í nóvember. Ríflega hálfum mánuði síðar hefur slík sala ekki hafist og ekki hefur verið gengið frá flugrekstrarleyfi. Samgöngustofa staðfestir í samtali við DV að slíkt leyfi er ekki komið í höfn enda myndi það þá vera birt á vef Samgöngustofu.
Samkvæmt kynningunni er gert ráð fyrir að flug hefjist hjá félaginu strax á þessu ári þótt gert sé ráð fyrir að sætanýting verði minni út árið og á fyrstu sex mánuðum ársins 2020.
Að sögn heimildarmanns DV ber kynning PLAY með sér gífurlega bjartsýni stofnenda og gerir ráð fyrir miklum og hröðum vexti.
„Þeir ætla að byrja með tvær vélar og fjölga í sex fyrir næsta vor. Þetta var eitt af því sem reyndist WOW svo erfitt, allur þessi hraði vöxtur, ef Play ætlar ekki að gera sömu mistök og WOW þá er þetta eitt sem þeir ættu alls ekki að gera.“
Play var gagnrýnt eftir kynninguna fyrir að gefa upp að flugliðar yrðu á lægra kaupi en hjá WOW, en þó hærra kaupi en hjá erlendum samkeppnisaðilum sem þeim bjóðist vinna hjá í dag. Það er ætlun Play að ráða þann mannauð frá WOW sem þegar hefur hlotið rétta þjálfun og menntun í störfin. Heimildarmaður DV segir að ef Play hafi vissulega tekist að finna leið til að lækka kostnað við áhöfnina, þá sé það stórvirki út af fyrir sig.
„Þetta er eitthvað sem bæði WOW air og Icelandair hafa barist við í gegnum tíðina. Þarna eru þeir á einu bretti að spara fjórðung eða meira af kostnaðnum án vandræða, ef þeim tókst það þá ætti Icelandair að ráða þessa menn og borga þeim mjög vel, enda búnir að leysa mjög stórt vandamál fyrir fyrirtækið.“
Samkvæmt heimildum DV er einnig athugavert að félagið hafi gefið upp að þeir hafi samið á áður óþekktum kjörum um þjónustu á flugvellinum, svonefnda „ground handling“. Þetta gefi til kynna að Play hafi ekki samið við stærri aðila á Keflavíkurflugvelli, heldur mun minna og reynsluminna fyrirtæki sem hafi líklega ekki mikla reynslu af því að þjónusta áætlunarflug.
Varðandi áætlaðan hagnað félagsins, og 12 til 13 falda fjárfestingu til baka til hluthafa segir heimildarmaðurinn að þarna sé óhófleg bjartsýni á ferð. „Þetta er algjörlega út í hött. Það geta allir orðið ríkir í Excel og Play ætlar sér svo sannarlega að vera það.“
Tvær vikur eru liðnar síðan tilkynnt var um nafn og áætlanir flugfélagsins Play. Tveimur vikum síðar er félagið strax komið á eftir áætlun og engir farmiðar farnir í sölu þegar rúmur mánuður er eftir af þessu ári.
Ekki náðist í upplýsingafulltrúa Play við vinnslu fréttarinnar.
