Magnús Ragnarsson, framkvæmdastjóri hjá Símanum, fagnar svartri skýrslu Ríkisendurskoðunar um starfsemi RÚV sem kom út í morgun.

Segir hann það staðfestingu á því sem hann hafi bent á í mörg ár:

„Ríkisendurskoðun staðfestir það sem ég hef hrópað á torgum um árabil, að stjórn og stjórnendur Ríkisútvarpsins brjóti lög sérhvern dag.“

Í skýrslunni kemur fram að RÚV hafi ekki farið að samkeppnislögum, en RÚV bar að stofna dótturfélög um þann rekstur sem ekki féll undir fjölmiðlaþjónustu í almannaþágu, en gerði ekki. Segir í skýrslunni að RÚV hafi þar með beitt sér með ólögmætum hætti á samkeppnismarkaði.

Þá er einnig gerð krafa um skýrari aðgreiningu í bókhaldinu og að gengið verði lengra í að gera formlega arðsemiskröfu til samkeppnisrekstrar og það sé ófrávíkjanleg krafa að bókhaldið sé gegnsætt.

Þá er skuldastaða RÚV sögð mikil og greiðslugeta veik.

Vissu af eigin brotum

RÚV hefur brugðist við skýrslunni. Í tilkynningu segir:

„Skýrslan staðfestir margt sem stjórn og stjórnendur RÚV hafa áður vakið athygli á og undirstrikar þann mikla árangur sem orðið hefur af aðgerðum undanfarinna ára til að styrkja rekstur RÚV og efla almannaþjónustuhlutverk þess.“

Tilkynningu RÚV má lesa hér.