Eyjan fjallaði um fyrr í dag að framkvæmdir um klósettaðstöðu í Gufunesbæ væru komnar inn í íbúakosningu Reykjavíkurborgar sem nú stendur yfir, en 20 milljónir eru eyrnamerktar verkefninu.

Hinsvegar var sama framkvæmd samþykkt af meirihlutanum í fyrra og á því hvort sem er að koma til framkvæmdar, óháð niðurstöðu kosninganna.

Sjá nánar: Íbúakosning Reykjavíkurborgar sögð undarleg – Kosið um klósett sem var þegar á fjárhagsáætlun

Össur Skarphéðinsson, fyrrverandi utanríkisráðherra og formaður Samfylkingarinnar, gerir nett grín að þessu máli í færslu á Facebook:

„Þegar ég var umhverfisráðherra stríddi íhaldið mér á þvi að ég hefði náð þeim stórkostlega árangri að láta gera klósett á Hornströndum. Seinna var ég með Birni Bjarnasyni í Þingvallanefnd og Guðlaugur Þór – sem þá flaðraði minna upp um Björn en í dag – sagði að ég væri alltaf á uppleið. Eftir tíu ára starf lægi það eftir okkur Björn að hafa gert 30 klósett á Hakinu. – Nú fetar Dagur í mitt fótspor og stendur fyrir íbúakosningu um klósett í Gufunesi. Þetta er ekki slæm arfleifð – eða hvað?“