Tveir læknar sögðu upp á Reykjalundi í gær í kjölfar uppsagnar á forstjóra og síðar framkvæmdastjóra Reykjalundar. Hafa því alls átta af 15 læknum sagt upp störfum. Fjórir til viðbótar eru sagðir íhuga stöðu sína og stefnir því í algeran glundroða ef fram heldur sem horfir, enda erfitt að ráða inn lækna þar sem um mjög sérhæfða starfssemi er að ræða. Einhverjir læknar ætla þó að vinna út uppsagnarfrestinn, en ekki allir.

Svandís Svavarsdóttir, heilbrigðisráðherra, segir við Morgunblaðið að ríkið geti ekkert gert í málinu, það geti ekki gripið inn í atburðarrásina með beinum hætti þar sem Reykjalundur sé sjálfseignastofnun:

„Það er náttúrlega alveg ljóst að það verður að finna leið til þess að koma starfseminni aftur á réttan kjöl. Bæði Sjúkratryggingar Íslands og Embætti landlæknis hafa óskað eftir upplýsingum um stöðuna frá stjórn SÍBS. Ég er upplýst um þessi bréfaskipti og ekkert svar hefur borist.“