Björn Bjarnason, fyrrverandi ráðherra Sjálfstæðisflokksins, baunar duglega á Helgu Völu Helgadóttur, þingkonu Samfylkingarinnar, vegna pistils er hún skrifaði í Morgunblaðið á dögunum. Þar fór Helga Vala mikinn og fór hörðum orðum um Davíð Oddsson og Morgunblaðið, sem hún sagði hafa fallið á fagmennskuprófinu og ritstjórinn afvegaleitt umræðuna með rógi og níð.
Af orðum Helgu mátti skilja að með pistlum sínum í blaðið væri hún að koma með einskonar mótvægi við stefnu blaðsins, með því að breiða út boðskap jafnaðarmennskunnar.
Björn Bjarnason er þó á öðru máli og má greina á orðum hans að hann telji Helgu Völu aðeins upphefja sjálfa sig:
„Helga Vala Helgadóttir hefur þörf fyrir að láta umbjóðendur sína vita hve miklu hún fórnar með að sinna stjórnmálastörfum. Stundum verður henni þó um megn að gera það. Hún hafði til dæmis ekki þrek til að sitja undir ræðu forseta danska þingsins, Piu Kjærsgaard, á þingfundi á Þingvöllum 18. júlí 2018. Birtist mynd af Helgu Völu þar sem hún gekk á brott eftir að hafa laumað sér af þingpallinum.“
Um þær ástæður sem Helga Vala nefndi í pistlinum, hvers vegna hún hafi geð í sér að skrifa í blaðið, segir Björn að betur færi á að hún sniðgengi Morgunblaðið:
„Svar Helgu Völu við þessum ábendingum kemur ekki á óvart: Hún hefur ákveðið að fórna sér fyrir „boðskap og stefnu okkar jafnaðarmanna í Samfylkingunni“ með því að skrifa í blaðið þótt margir stuðningsmenn hennar og vafalaust enn fleiri lesendur Morgunblaðsins kysu að hún veldi sama kost og hún gerði á Þingvallafundinum.“
Þá staðhæfir Björn að pistill Helgu Völu snúist aðeins um hana sjálfa, en ekki hugsjónir jafnaðarmanna, þar sem hann hafi verið birtur aðeins degi eftir að fréttaflutning um meinta stelsýki hennar:
„Daginn áður en Helga Vala birti síðasta boðskap jafnaðarmennskunnar í boði ritstjóra Morgunblaðsins sagði Grímur Atlason, eiginmaður hennar, á Facebook:
„Samkvæmt Davíð Oddssyni, Sigmundi Davíð, Miðflokknum og málgagni þeirra Morgunblaðinu hef ég búið með drykkjukonu [sjá mynd] og þjófi í 20 ár. Við því er þetta að segja: Aum var þeirra sókn en hún var þó hátíð miðað við vörnina.
Ég hef sagt það áður og geri það aftur: Éttann sjálfur ómennið yðar!“
Hugleiðing Helgu Völu í Morgunblaðinu 25. janúar snerist auðvitað um hana sjálfa en ekki hugsjónir jafnaðarmanna, þær eru aðeins yfirvarp.“
