Brynjar Níelsson, þingmaður Sjálfstæðisflokksins, er ekki sáttur við þá meðferð sem nýr forsætisráðherra Bretlands, Boris Johnson, fær hjá andstæðingum sínum og fjölmiðlum. Segir hann sönginn kunnuglegan úr átt vinstrimanna:
„Þegar borgaralegu lýðræðisöflin verða þeirrar gæfu aðnjótandi að velja til forystu öfluga leiðtoga fara andstæðingarnir, og sérstaklega miðlar þeirra, að ráðast að persónunni. Þeir eru gjarnar illa gefnir. Spilltir eru þeir undantekningalaust og valdasjúkir rugludallar og þegar mikið liggur við eru þeir geðsjúklingar og ofbeldismenn. Nú er þessi söngur allur byrjaður með nýjan forsætisráðherra Bretlands.“
Brynjar nefnir önnur dæmi um hægri menn sem honum þykir hafa hallað á í umfjöllun fjölmiðla og vinstrimanna:
„Þetta eru ekki fullkomnir menn frekar en aðrir. Ronald Reagan, sem vinstri menn sögðu heimskari en allt sem heimskt var, viðurkenndi þegar hann gerði mistök en skýringin á þeim væri sú að hann hafi verið svo lengi í Demókrataflokknum áður. Kannski er sama skýringin á mistökum Trump. Vinstri mönnum var sérstaklega í nöp við frú Thatcher en hún náði þó að færa Bretland úr stöðnuðu samfélagi, sem var í heljargreipum sósíalista úr verkalýðshreyfingunni, inn í nútímann til verulegra hagsbóta fyrir alla landsmenn. Sama gerðist í undir forystu Davíðs Oddsonar hér á landi. Þetta voru forystumenn sem létu til sín taka en ekki luðrur sem tönnluðust á því hversu uppfull þau væru af góðmennsku og mannúð, en gerðu svo aldrei neitt nema að hækka skatta og auka afskipti ríkisvaldsins af öllu mögulegu. Svo mega þeir eiga það þessir öflugu forystumenn að þeir voru ekki mikið í því að drepa menn úr leiðindum.“
