„Á fundi utanríkismálanefndar í dag var tekin ákvörðun um að taka málið um 3. orkupakkann úr nefndinni, hafna frekari gestakomum og taka málið til umræðu á morgun þriðjudag. Tillagan var samþykkt með öllum atkvæðum nema einu, atkvæði Miðflokksins. Aðeins er gefinn einn dagur til þess að leggja fram minnihlutaálit. Það er er óeðlilega skammur tími í jafn stóru máli.“

Svo hefst tilkynning frá Miðflokknum eftir fund utanríkismálanefndar  í dag, þar sem sagt er að þröngva eigi þriðja orkupakkanum í gegnum þingið á skömmum tíma, þrátt fyrir andstöðu þjóðarinnar. Telja þingmenn Miðflokksins að málsmeðferðin sé með öllu óboðleg:

„Hér er um að ræða afar þýðingarmikið mál sem varðar mikla þjóðarhagsmuni. Nefnd er tekur slíkt mál til umfjöllunar ber að kynna sér sjónarmið allra þeirra er þekkingu hafa á slíkum málum, annað er Alþingi lítt til sóma. Það má ljóst vera að ætlunin er að þröngva málinu í gegnum Alþingi á sem skemmstum tíma þrátt fyrir að málið valdi mörgum áhyggjum og mikil andstaða sé við það meðal þjóðarinnar.“

Flokkur fólksins, sem einnig hefur lagst gegn innleiðingu þriðja orkupakkans,  á ekki sæti í nefndinni, en Inga Sæland, formaður Flokks fólksins, situr þar sem áheyrnafulltrúi.