„Það gengur ekki að hafa skólakerfi sem hægt og rólega blæðir út vegna þess að fólk hrökklast úr starfi og snýr ekki til baka. Laun og starfsaðstæður eru ástæða þess að rúmur helmingur menntaðra grunnskólakennara starfa ekki við grunnskólakennslu. Það sem er óhugnanlegt er að þeir telja afar ólíklegt að þeir snúi aftur,“ segir Ragnar Þór Pétursson, sem tekur á næstu dögum við sem formaður Kennarasambandsins, í þættinum Morgunvaktin á Rás 1 í morgun.

Aðspurður hvort það sé dregin upp of dökk mynd af menntakerfinu segir Ragnar Þór að vissulega sé mjög margt vel gert í skólamálum hér á landi. „Ég hef kennt í 20 ár, unga kynslóðin hefur aldrei verið jafn vel heppnuð og ég að hún hafi aldrei átt jafn góða foreldra. Það eru áskoranir, þessi nútímatækni, samfélagsmiðlar og hlutir sem sumir kalla firringu, þetta er áskorun. Við vitum það líka að börn í vanda eru í mjög djúpum vanda í dag.“

Ragnar Þór segir að stjórnmálamenn á sveitarstjórnarstigi séu hræddir.

„Það fyrsta sem sveitarstjórnarframbjóðandi fær að vita er að hann skal ekki segja neitt sem ógnar þessu kerfi.“

Þar sem samningar við kennara séu undir regnhlíf Samtaka íslenskra sveitarfélaga þá noti sveitarstjórnarmenn það sem skjól í umræðu um menntamál.

„Þeir eru logandi hræddir við að það verði einhver læti núna fyrir sveitarstjórnarkosningarnar vegna þess að samningar eru lausir. Það vill enginn sveitarstjórnarmaður þurfa að taka slaginn um þetta þannig að menn halda sér í fjarlægð, sem er mjög misráðið. Það er mjög misráðið að þú bjóðir þig fram til sveitarstjórnar og takir ekki afstöðu og takir umræðu um stærsta verkefni sveitarfélagsins, sem eru skólamálin. Umræðan má ekki snúast um hvort börnum sé reddað leikskólaplássi með því að koma þeim fyrir hjá eldri borgurum eða að byggja nýjan leikskóla, það þarf að tala um menntun.“