„Afrakstur af flugeldasölu björgunarsveita er ekki „handa björgunarsveitum“ heldur til þess að hægt verði að halda uppi viðunandi björgunar- og almannavarnaviðbragði í landinu,“ segir Smári Sigurðsson, formaður slysavarnafélagsins Landsbjargar í áramótakveðju sinni.

Það styttist í áramót og líkt og mörg fyrri ár er umræðan um flugelda, flugeldasölu, áhrif þeirra á umhverfið og mögulegt bann þeirra orðin hávær í umræðunni manna á milli, bæði í raunheimum og á samfélagsmiðlum. Færslur um hvort Landsbjörg eða aðrir flugeldasalar muni bjarga flugeldakaupanda úr mögulegum háska eru einnig áberandi, sem og skot á þá sem hyggjast ekki styrkja Landsbjörgu með flugeldakaupum.

Segir Smári björgunarsveitir ekki vera sérstaka varðhunda flugelda, en munu eftir megni verja ávinningnum sem fer í verkefnin sem sveitirnar leysa af hendi.
„Við höfum ekki fundið aðra leið til fjármögnunar. Það þarf að skoða báða enda tommustokksins þegar rætt er um afleiðingar flugelda, ræða kostina og gallana, og hvar hagsmunirnir eru meiri eða minni. Fjármögnun viðbragðs björgunarsveita er ekki einkamál sjálfboðaliðanna að leysa.“

Samfélagið yrði brothættara nyti sjálfboðaliða Landsbjargar ekki við

„Það má treysta því að klukkan gengur og að sama skapi standa félagar mínir í björgunarsveitunum vaktina 24/7 sem endranær. Mikið hefur mætt á okkar fólki og þau víða komið við á árinu. Samfélagið yrði brothættara ef þeirra nyti ekki við,“ segir Smári og segir stuðning landsmanna við björgunarsveitirnar jafnmikilvægan og stuðning þeirra við samfélagið.

Flugeldasalan hefur ávallt verið stærsta fjáröflun Landsbjargar, sem einnig selur Neyðarkallinn í nóvember ár hvert og er aðili að Íslandsspilum. Nýtt verkefni, Skjótum rótum, var kynnt núna í desember og geta landsmenn keypt græðling á öllum sölustöðum Landsbjargar. Einnig er Bakvarðasveitin mikilvægur hlekkur í starfsemi félagsins.

Hugmynd Rakelar til styrktar Landsbjörgu var fljót að Skjóta rótum

„Til þessa hefur ríkt ágæt sátt um samstarfið þar sem íbúar og fyrirtæki í hverju sveitarfélagi hafa lagt björgunarsveitinni lið og á móti eru sjálfboðaliðarnir til í að leggja heilmikið á sig til að gera landið byggilegra:“