Mikill þrýstingur er nú á Dag B. Eggertsson borgarstjóra eftir að Innri endurskoðun Reykjavíkurborgar skilaði kolsvartri skýrslu um braggamálið. Björn Bjarnason, fyrrverandi ráðherra, skrifar um málið í dag:

„Að brugðist skuli við skýrslu sem felur í sér fullyrðingar um lögbrot æðstu stjórnenda Reykjavíkurborgar með því að skipa Dag B. Eggertsson borgarstjóra formann nefndar um viðbrögð við því gerir illt verra. Að minnihluti borgarstjórnar taki þátt í slíkum skrípaleik til að hvítþvo borgarstjóra er með ólíkindum,“ segir Björn sem telur sérstaklega alvarlegt að tölvupóstar milli Dags og þáverandi skrifstofustjóra skrifstofu eigna og atvinnuþróunar Reykjavíkurborgar, Hrólfs Jónssonar, um málið skuli ekki finnast. Eyðing slíkra gagna varði við lög:

„Stjórnendur Borgarskjalasafnsins taka af skarið á vefsíðu sinni og segja að það komi „fram með afar skýrum og áberandi hætti að lög og reglur um skjalastjórn opinberra stofnana voru þverbrotnar“ í bragga-málinu.

 Fá eða nokkur skjöl finnast um málið hjá Reykjavíkurborg, tölvubréfum hefur verið eytt og tölva borgarstjóra er óskoðuð. Svanhildur Bogadóttir borgarskjalavörður segir í Morgunblaðinuí dag þegar hún er spurð hvort refsing sé við því að brjóta lög um opinber skjalasöfn: „Þar segir í 47. gr að það geti varðað allt að þriggja ára fangelsi að hafa ekki skráningu mála, flokkun og frágang skjala í samræmi við reglur.“

 Telur borgarstjóra segja ósatt

Vigdís Hauksdóttir, borgarfulltrúi Miðflokksins, segist efast um að Dagur segi satt er hann lýsir því yfir að honum hafi ekki verið kunnugt um mikla framúrkeyrslu í verkefninu. Í viðtali í útvarpþættinum Harmageddon segir Vigdís:

„Hrólfur var alltaf í beinu samband við Dag. Svo kemur Dagur fram í fréttum í gær og segir: Ég veit bara ekkert um braggann. Mér var bara aldrei kunnugt um hann. Mér er það til efs að borgarstjóri sé að segja satt og það bara stenst ekki að hann sé að segja satt. Þess vegna kalla ég eftir afsögn hans. Sé hann að segja satt þá kallar það líka á afsögn því hann sem framkvæmdastjóri borgarinnar getur ekki látið borgina vera í svo stórum verkefnum og svo stóru spillingarverki sem bragginn er án þess að hafa vitneskju um það. Ef hann veit ekki af því þá er hann að bregðast skyldum sínum sem borgarstjóri.“