Katrín Jakobsdóttir forsætisráðherra segir að Alþingi þurfi að grípa til aðgerða vegna kvenfyrirlitningar og fordóma þingmannanna sex sem funduðu á Klaustur Bar í síðustu viku. Katrín segir í færslu á Facebook að háværu samræður þingmannanna á almannafæri séu uppfullar af fordómum, kvenfyrirlitningu og óheilbrigðum viðhorfum til stjórnmála: „Þau orð sem komu úr munni þingmannana eru ótrúleg og dapurleg. Ég hélt satt að segja að við værum komin lengra á veg í raunverulegri viðhorfsbreytingu, núna ári eftir #églíka-byltinguna.“

Katrín segir að forsætisnefnd Alþingis muni fara yfir málið. „Það er mikilvægt að Alþingi fari vel yfir málið og grípi til aðgerða. Það er samt ekki nóg því við sem samfélag þurfum að taka sameiginlega á því meini sem svona orðræða skapar; þeim ótta og þeirri vanlíðan sem hún veldur.“

Nú þegar landsmenn fagna hundrað ára afmæli fullveldisins þá eigum við að hugsa um þau gildi sem við viljum hafa að leiðarljósi í samfélagi okkar. „Þar hljótum við að vilja að hafa gildi á borð við jafnrétti og virðingu í hávegum. Sú orðræða sem við höfum lesið um í fjölmiðlum er því miður í fullkominni andstöðu við slík gildi. Sem samfélag eigum við að hafna slíkri orðræðu.“