Eigendur flugvéla, sem WOW air er með í rekstri, hafa áhyggjur af að ekki verði af samruna WOW og Icelandair og að félagið geti ekki staðið í skilum um næstu mánaðarmót þegar það hefur greitt starfsfólki sínu laun. Þessi félög sérhæfa sig í fjármögnun og útleigu flugvéla. Þau eru sögð tilbúin til að grípa til aðgerða ef misbrestur verður á greiðslum.

Markaður Fréttablaðsins skýrir frá þessu í dag. Blaðið fjallar um bréfið sem Skúli Mogensen, forstjóri og eini hluthafi WOW air, sendi skuldabréfaeigendum félagsins í gær. Í því kom fram að fyrrgreindir eigendur flugvélanna fylgist náið með stöðu WOW og krefjist nú strangari greiðsluskilmála en áður og það hafi neikvæð áhrif á sjóðsstreymi félagsins. Morgunblaðið segir að bréf Skúla setji þrýsting á skuldabréfaeigendur um að liðka fyrir kaupum Icelandair á WOW air.

Kröfuhafar og leigusalar WOW air þurfa að gefa ákveðnar kröfur eftir og liðka fyrir breyttum skilmálum til að Icelandair geti keypt félagið. Ef það verður ekki gert er að sögn Morgunblaðsins ósennilegt að hluthafar Icelandair Group muni samþykkja yfirtöku á WOW air á hlutahafafundi sem haldinn verður á föstudaginn.

Samkvæmt frétt Markaðarins leitar WOW nú allra leiða til að bæta lausafjárstöðu sína og hefur meðal annars skoðað að selja lendingarstæði sín á Gatwick-flugvellinum í Lundúnum en þau eru mjög verðmæt.