Björn Bjarnason, fyrrum ráðherra Sjálfstæðisflokksins, telur Loga Einarsson, formann Samfylkingarinnar ekki til pólitísks klækjarefs, ef marka má pistil hans í dag um útspil Samfylkingarinnar og Pírata varðandi vantrauststillögu þeirra í garð Sigríðar Á. Andersen dómsmálaráðherra.

Landsfundur Samfylkingarinnar var um síðustu helgi, þar sem bæði Logi og Jóhanna Sigurðardóttir báðu þingmenn Samfylkingarinnar um að gefa VG grið, og beina spjótum sínum heldur að spillingarflokkunum, Sjálfstæðisflokki og Framsókn. Björn segir þetta hafa verið yfirvarp því Logi hafi vísvitandi reynt að kljúfa VG með tillögunni um vantraust:

„Logi var ekki fyrr kominn út af landsfundinum en hann tók höndum saman við Pírata til að koma höggi á Vinstri græna með því að flytja vantraust á Sigríði Á. Andersen. Loga var jafnljóst og öðrum að honum tækist ekki að sprengja stjórnarsamstarfið með því að flytja vantrauststillöguna. Tilgangurinn var sá að kljúfa Vinstri græna af því að Logi vissi að tveir þingmenn flokksins, Rósa Björk og Andrés Ingi, mundu ekki greiða atkvæði með stjórnarflokkunum í málinu.“

Þá segir Björn að Samfylkingin líti á VG sem sinn helsta keppinaut og vilji flokkinn feigan:

„Þótt Jóhanna og Logi létu á landsfundinum eins og þau bæru sérstaka umhyggju fyrir VG líta þau á flokkinn sem helsta keppinaut sinn og sjá ofsjónum yfir að hann höfðar meira til kjósenda til vinstri en Samfylkingin. Þau vilja ekki samstarf við VG heldur flokkinn feigan.“

Þá lýkur Björn pistli sínum á föstu skoti á Loga:

„Logi Einarsson er ekki maður ígrundaðs málflutnings eða rökstuddra ákvarðana í stjórnmálum eins og vantrauststillagan og upphlaup hans gegn Bjarna Benediktssyni vegna vopnaflutningamálsins hafa nýlega sýnt. Líklega ofmetnaðist hann vegna einróma stuðnings á landsfundi flokksins. Logi minnir á Martin Schulz, leiðtog þýskra jafnaðarmanna, sem á einu ári féll úr hæstu hæðum og hrökklaðist til hliðar í þýskum stjórnmálum, ekki síst vegna ofmetnaðar.“