Fulltrúaráð sjálfstæðisfélaganna í Vestmannaeyjum samþykkti á fundi sínum á mánudag að ef að 10 eða fleiri frambjóðendur gæfu kost á sér, yrði röðun fyrir valinu á listann. Ekki bárust svo mörg framboð og því mun kjörnefnd hefja vinnu við uppstillingu, líkt og gert hefur verið síðustu áratugi. Þetta er haft eftir Ólafi Elíssyni, formanns kjörnefndar Sjálfstæðisflokksins, á Eyjar.net í dag.
Samkvæmt Eyjum.net höfðu fimm gefið kost á sér í röðun, bæjarstjórinn Elliði Vignisson, og bæjarfulltrúarnir Hildur Sólveig Sigurðardóttir, Trausti Hjaltason og Birna Þórsdóttir. Þá segir að varabæjarfulltrúi flokksins Margrét Rós Ingólfsdóttir, hafi einnig gefið út að hún gæfi kost á sér í röðun.
Mikið hefur gengið á í Sjálfstæðisflokknum í Eyjum, eftir að ákveðið var að fara í prófkjör, í fyrsta skipti frá 1990, en síðan hætt við og ákveðið að raða upp á listann. Elliði Vignisson, bæjarstjóri, sagðist vilja prófkjör, sem er meginregla hjá flokknum, en greiddi síðan sjálfur atkvæði gegn tillögunni um prófkjör. Ekki voru allir sáttir við þá ákvörðun og tal um klofning var orðið býsna hávært og enn er ekki útséð með slíkt, en Íris Róbertsdóttir, formaður ÍBV, var nefnd sem oddviti nýs framboðs.
