Gunnar Smári Egilsson, stofnandi Sósíalistaflokks Íslands, setur fram áhugaverða tölfræði á Facebooksíðu sinni um skiptingu auðs á Íslandi. Þar segir að aðeins 50 manneskjur á Íslandi eigi 53% alls eiginfjár íslenskra fyrirtækja og 950 manns til viðbótar eiga önnur 45 prósent alls eiginfjár fyrirtækja. Þá eigi restin af þjóðinni, um 339,000 manns, tvö prósentin sem eftir eru.

Þá segir Gunnar Smári að Samtök atvinnulífsins stundi grimma hagsmunavörslu fyrir hina ofurríku:

„Samtök atvinnulífsins eru því langt í frá eitthvað sem kalla mætti samtök atvinnulífsins heldur grimm hagsmunavarsla fámennustu klíku landsins, örfárra manneskja sem nýta auð sinn til að sveigja stjórnmálin að eigin þörfum og til að láta stjórnmálamenn éta úr lófa sínum.“

Gunnar Smári nefnir réttilega  að erlendis sé gjarnan sé talað um að ríkasta eitt prósent heimsins, lifi í vellystingum á kostnað hinna 99 prósentanna, því samkvæmt skýrslu svissneska fjármálarisans Credit Suisse, á ríkasta eitt prósent milljarðamæringa á jörðinni samtals helming allra auðæfa heimsins.

Hinsvegar sé staðan önnur á Íslandi, þar sem 50 manns teljist aðeins til 0,015% af þjóðinni og tíu manns eru 0,003 prósent landsmanna, samkvæmt Gunnari Smára. Ekki kemur þó fram hvaðan Gunnar hefur þessa tölfræði.

Að lokum segir Gunnar Smári:

„Staðan á Íslandi er sú að stjórnmálin snúast um hagsmuni 0,3% landsmanna á meðan litið er fram hjá hagsmunum 99,7%. Og í raun er staðan sú að hagsmunum þess hóps er fórnað fyrir hagsmuni 0,003% landsmanna, tíu manna. Allt sem þið stritið, allt sem þið stússið við og allt sem þið sinnið knýr áfram auðsöfnun þessara tíu manna. Þannig er Ísland í dag.“