Gunnar Hrafn Jónsson þingmaður Pírata óskar Óttari Guðmundssyni lækni til hamingju með að hafa lifað af æsku sína án barnalæsinga og öryggisbelta, en það hafi ekki allir verið jafn heppnir. Pistill sem Óttar skrifaði á Stundina árið 2015 hefur aftur farið á flug á samskiptamiðlum, hefur meira að segja grínvefurinn Gys.is gert grín að orðum Óttars í dag, þar ræðir Óttar um öryggiskynslóðina sem sé ekki tilbúin fyrir mótlæti:

Ég svaf í rúmi sem var málað með krabbameinsvaldandi blýmálningu. Engin örugg lyfjaglös með barnalæsingu voru í umferð. Enginn var nokkru sinni með hjálm á hjólinu. Við drukkum vatn úr garðslöngum. Engin öryggisbelti voru í bílunum hvað þá heldur barnastólar. Við átum brauð og drukkum gos þegar það var fáanlegt en urðum aldrei feit enda vorum við alltaf úti að leika okkur,

sagði Óttar og bætti við:

Barnakennarinn minn var löngu síðar afhjúpaður sem barnaperri. Hvassaleitisdóninn og aðrir gluggagægjar með sýniþörf voru hluti af veruleikanum en ekki man ég eftir því að fólk óttaðist dónann.

Nútímaforeldrar keppist hins vegar við að búa til hina „fullkomnu æsku“ og reyna sitt ýtrasta að koma í veg fyrir að barnið lengi í erfiðleikum eða vandræðum. Velti hann því fyrir sér hvort það skapi ósjálfstæða einstaklinga sem kunni hreinlega ekki að bregðast við vandamálum daglegs lífs, í dag leiti til dæmis ungt fólk sem lenti í sambandsslitum á geðdeild, eitthvað sem hefði verið óhugsandi á árum áður.

„Til hamingju með að sleppa svona vel, það gerðu það ekki allir“

Gunnar Hrafn svarar pistlinum í færslu á Fésbók í dag og óskar Óttari til hamingju með að hafa lifað af:

Til hamingju með að lifa það af Óttar, sem læknir ættirðu samt að vita að það voru ekki allir svo heppnir og dánartíðni barna hrundi við þessar breytingar sem þú sérð ekki tilganginn með. Fullt af börnum fengu krabbamein sem þau hefðu annars verið laus við, fullt af börnum dóu úr lyfjaeitrun, fullt af börnum fengu heilahristing eða höfuðkúpubrot við hjólreiðar, enn fleiri dóu í umferðinni.

Varðandi perrana sem enginn hafi óttast segir Gunnar Hrafn:

Hefur þú verið algjörlega sofandi, Óttar, á meðan flett var ofan af skipulagðri misnotkun barna um allt Ísland áratugum saman? Það eru sár sem aldrei gróa.

Þetta er eins og þegar talsmaður Þjóðhátíðar sagðist ekki vilja fá eftirlit frá Stígamótum því þá væru alltaf svo margar nauðganir. Best að vita bara ekkert af þessu! Svo lengi sem ekkert kemur fyrir þig, Óttar, er greinilega allt í lagi með alla aðra.

Til hamingju með að sleppa svona vel, það gerðu það ekki allir. Það er full ástæða til að fagna því að fólk viti betur í dag en að leggja börnin sín í bráða hættu, röfl um annað er firring og blind fortíðarást.