Björgvin G. Sigurðsson skrifar:

Miskunnarlaus afstaða stjórnvalda í málefnum hælisleitenda hefur gengið fram af mörgum. Steininn tók úr þegar flóttastúlkunum Mary frá Niegeríu og Haniye, sem er af afgönskum ættum, var vísað frá landi í skjóli Dyflinar reglugerðarinnar, sem heimilar slíka brottvísun en fjarri því að skyldi stjórnvöld til þess. Það er ísköld pólitísk ákvörðun að vísa stúlkunum úr landi, út í óvissuna.

Þetta er skammarleg afstaða. Nú er það löggjafans að grípa inn í sem getur hæglega sett lög um ríkisborgararétt þeim til handa. Logi Einarsson, formaður Samfylkingarinnar, hefur boðað slíkt frumvarp á fyrstu dögum þingsins. Það er fagnaðarefni og mikill sómi af flutningi þess. Nú reynir á þingið að ganga fram af mildi og mannúð í stað miskunnarleysis framkvæmdavaldsins.

Það er siðferðisleg skylda vel megandi þjóðanna í vesturheimi að gera allt sem í þeirra valdi stendur til þess að skjóta skjólshúsi yfir landlaust flóttafólk sem á sér ekkert samastað í tilverunni. Það að vísa börnum á flótta úr landi er afstaða sem á sér engar málsbætur og er alvarlegur áfellir fyrir viðkomandi stjórnvöld.

Salvör Nordal, umboðsmaður barna, hefur lýst þungum áhyggjum af stöðu barna sem sækja um alþjóðlega vernd á Íslandi og hefur bent á að stjórnvöldum beri að fylgja Barnasáttmála Sameinuðu þjóðanna sem hefur verið lögfestur á hérlendis. Undir það sjónarmið má heilshugar taka, ekki síst í tíð núverandi ríkisstjórnar og þeirrar ómanneskjulegu afstöðu sem ítrekað hefur komið fram í málefnum flóttafólks og hælisleitenda.

Tveir stjórnarþingmenn, þau Hanna Katrín Friðriksdóttir og Jón Steindór Valdimarsson, þingmenn Viðreisnar, hafa lýst sig fylgjandi því að stúlkurnar fái hæli á Íslandi. Því gæti það orðið söguleg afgreiðsla i þinginu ef frumvarp Loga gengur til atkvæða og þessir, og vonandi aðrir, þingmenn stjórnarmeirihlutans greiða atkvæði með frumvarpi til laga um ríkisborgararétt stúlkannna.

Fordæmin eru fjöldamörg. Sá sem þetta skrifar flutti mörgum sinnum frumvarp til laga um ríkisborgararétt sem formaður Allsherjar- og menntamálanefndar Alþingis, þar sem undanþága var veitt fólki sem hingað vildi koma og ríkisborgararéttur með sérstökum lögum. Þá er atkvæðagreiðslan um ríkisborgararétt Bobby Fischer frá 2005 skínandi fordæmi fyrir slíku, en afgreiðsla þess máls tók einn dag í þinginu.

Vonandi snýr þingið miskunnarlausri afstöðu stjórnvalda við og sýnir mannúð og mildi í verki með því að veita þeim Mary og Haniye ríkisborgararétt án tafar og þar sem skjól og öryggi i tilverunni.

Leiðari Björgvins G. Sigurðssonar birtist fyrst í Suðra. Smelltu hér til að lesa blaðið.