Þorgerður Katrín Gunnarsdóttir sjávarútvegs- og landbúnaðarráðherra segir að stjórnarslitin sýni að fólk hafi fengið nóg af leyndarhyggju kerfi þar sem ofbeldi gegn konum og börnum sé tekið af léttúð og andvaraleysi. Viðreisn hefur farið fram á að kosið verði sem fyrst, en óvíst er hvaða áhrif það getur haft á Viðreisn sem myndi jafnvel ekki ná inn manni í næstu kosningum ef marka má skoðanakannanir að undanförnu. Sigríður Andersen dómsmálaráðherra hefur sagt það stórkostlegt ábyrgðarleysi af hálfu Bjartrar framtíðar og það vera ömurlegt af þeim að hafa notað sér málið til að slíta stjórnarsamstarfinu. Þorgerður Katrín segir hins vegar á Twitter að stjórnarslitin sýni að fólk hafi fengið nóg af leyndarhyggju:

Stjórnarslitin sýna að fólk hefur fengið nóg af leyndarhyggju kerfi þar sem ofbeldi gegn konum og börnum er tekið af léttúð og andvaraleysi,

segir Þorgerður Katrín. Hún segir jafnframt á Fésbók að æskilegast sé að boða til kosninga sem fyrst. Verkefni stjórnmálanna sé að breyta úreltum kerfum og uppræta sterka tilhneigingu ákveðinna hópa til að standa vörð um sérhagsmuni fram yfir almannahagsmuni:

Kerfi sem einkennist af leyndarhyggju og stendur vörð um ofbeldismenn en ekki fórnarlömb er meingallað og djúpstæð vonbrigði þjóðarinnar með viðbrögð stjórnvalda í þessum málum er eittvað sem við verðum að taka mjög alvarlega.