Í nýrri skýrslu frá hugveitunni European Council on Foreign Relations er fjallað um tengsl rússneskra ráðamanna við starfsemi skipulagðra glæpastarfsemi í Evrópu. Fram kemur að þetta sé mikil ógn sem verið að bregðast við. Samkvæmt tölum frá Europol standa rússneskir glæpamenn á bak við um þriðjung af heróínsölu í álfunni, stóran hluta af mansali og megninu af ólöglegum vopnainnflutningi. Í skýrslunni er haft eftir rússneskum glæpamanni að í þessari starfsemi glæpasamtakanna mætist það besta frá tveimur heimum. Frá Rússlandi komi styrkurinn og öryggið en í Evrópu sé það velmegunin og þægindin.

Fram kemur að á undanförnum 20 árum hafi áherslur skipulagðra rússneskra glæpasamtaka í Evrópu breyst mikið. Í dag fari minna fyrir þeim á götunni en þeim mun meira baksviðs. Rússneskir glæpamenn séu bandamenn, leiðbeinendur og sjá evrópskum glæpagengjum og glæpahópum fyrir því sem þau þarfnast. Rússneska ríkið sé sjálft mjög glæpavætt og samspil „undirheimanna“ og „efri laga stjórnmálanna“ hafi orðið til þess að stjórnvöld noti glæpasamtök stundum í starfi sínu.

Skipulögð rússnesk glæpasamtök hafi meðal annars komið að peningaþvætti, tölvuárásum, þau hafi komið að því að styrkja pólitísk áhrif, þau hafi komið að mansali og smygli á vörum og hafi jafnvel séð um morð fyrir hönd ráðamanna í Kreml. Skýrsluhöfundar segja að evrópsk stjórnvöld verði að horfa á þetta með þeim augum að hér sé um beina öryggisógn að ræða ekki síður en hefðbundna afbrotastarfsemi.

Í skjali frá bandaríska sendiráðinu í Moskvu, sem var birt af Wikileaks, kom fram að rússneska ríkið og mafían ættu í samstarfi og að glæpamenn nytu verndar ríkisins. Í skýrslu European Council on Foreign Relaitons kemur fram að skipulögð glæpastarfsemi sé nú orðin vopn í stríði Rússlands gegn Vesturlöndum. Rússneskir glæpamenn eru sagðir hafa náð góðri fótfestu í ríkjum eins og Tékklandi, Ungverjalandi, Litháen, Frakklandi og Portúgal.

Heimildarmaður innan vestrænnar leyniþjónustustofnunar sagði skýrsluhöfundum að rússnesk yfirvöld virðist hafa gott tak á rússnesku glæpamönnunum.

Í skýrslunni eru nefnd nokkur dæmi um hvernig rússnesk yfirvöld virðast vinna með glæpagengjum.

Brottnám á eistneskum lögreglumanni sem var að koma upp um smyglstarfsemi sem rússneska öryggisþjónustuan FSB tengdist.

Glæpahópar séu nýttir til að smygla fólki og vopnum yfir landamæri þegar það hentar ráðamönnum í Kreml. Dæmi um þetta megi sjá í valdaránstilrauninni í Svartfjallalandi síðastliðið haust.

Leigumorðingjar eru sagðir hafa verið ráðnir til starfa til að myrða þá sem teljast ógn við Rússland.