Alríkisdómari á Hawaii setti í gær lögbann á nýja útgáfu ferðabanns sem Donald Trump undirritaði nýlega. Ferðabannið nær til ferða ríkisborgara sex ríkja til Bandaríkjanna. Trump segir að bannið sé nauðsynlegt til að koma í veg fyrir að öfgamenn komi til Bandaríkjanna en dómarinn dró gögn ríkisstjórnarinnar um þetta í efa og setti lögbann á ferðabannið.

Úrskurður dómarans kom nokkrum klukkustundum áður en bannið átti að taka gildi. Samkvæmt því verður fólki frá Íran, Líbíu, Sómalíu, Súdan, Sýrlandi og Jemen bannað að koma til Bandaríkjanna og á það jafnt við um ferðamenn sem flóttamenn. Dómarinn, Derrick Watson, sagði að „setja megi spurningamerki við gögn ríkisstjórnarinnar sem eiga að rökstyðja bannið“.

Úrskurður hans kemur í veg fyrir að ferðabannið taki gildi í dag. Trump brást að vonum illa við úrskurði dómarans og sagði hann vera dæmi um „áður óþekktan lagalegan yfirgang“. Hann sagði einnig að úrskurðurinn muni láta Bandaríkin líta „veik“ út og sagðist reiðubúinn til að fara með málið alla leið fyrir hæstarétt ef þörf krefur.

Nokkur ríki hafa reynt að koma í veg fyrir gildistöku bannsins og í gær fór málflutningur fram fyrir dómstólum í Maryland, Washington-ríki og Hawaii um hvort bannið ætti að taka gildi. Á Hawaii voru þau rök færð fram fyrir dómstólnum að bannið mismunaði á grundvelli þjóðernis og myndi koma í veg fyrir að ættingjar fólks frá umræddum sex löndum gætu komið til Hawaii að heimsækja ættingja sína.

Sky-fréttastofan segir að því hafi einnig verið haldið fram að bannið myndi hafa neikvæð áhrif á ferðamannaiðnaðinn og möguleikana á að ráða útlendinga til starfa sem og myndi þetta draga úr möguleikum námsmanna á að stunda nám í Bandaríkjunum.

Derric Watson var skipaður dómari af Barack Obama 2012.