„Sterk staða þjóðarbúsins og styrking krónunnar að undanförnu hefur skapað tækifæri til tafarlauss afnáms hafta,“ segir Sigurður Hannesson, framkvæmdastjóri hjá Kviku og fyrrverandi varaformaður framkvæmdahóps um losun hafta í grein sem hann ritar í Fréttablaðið í dag. Búið sé að tryggja að uppgjör á slitabúum gömlu bankanna stefia Íslandi ekki í voða og að aflandskrónur færðust út úr hagkerfinu með skipulegum hætti, í framhaldinu hafa því skapast aðstæður til að losa höftin að fullu.
Sigurður segir erlenda stöðu þjóðarbúsins aldrei hafa verið betri en nú og að Ísland sé búið að ávinna sér traust að nýju á alþjóðavettvangi. Íslensk fyrirtæki, félög og einstaklingar geti nú fjárfest erlendis og hafa lífeyrissjóðir að mestu nýtt heimildir sínar til þess.
Fjárfestingar á erlendum mörkuðum geta dregið úr efnahagsáhættu og eru því ekki aðeins skynsamlegar heldur nauðsynlegar fyrir lítið og opið hagkerfi. Fyrst og fremst hafa lífeyrissjóðir nýtt heimildir sínar til að fjárfesta erlendis en einstaklingar og fyrirtæki í minni mæli,
segir Sigurður. Hátt vaxtastig hér á landi þýðir að ávöxtun hérlendis er góð og hingað leiti fjármagn sem styrkir krónuna jafnt og þétt, Sigurður bendir hins vegar á að dæmin sanni að það geti breyst fljótt.
Frumskylda stjórnvalda að standa vörð um hagsmuni Íslands
Það hafi tekist að ljúka málefnum slitabúanna án nokkurra eftirmála, aflandskrónueigendur stóðu frammi fyrir skýrum valkostum. Að selja aflandskrónur fyrir gjaldeyri eða binda til lengri tíma. Segir Sigurður að ef stjórnvöld hleypi aflandskrónueigendum með eignir sínar úr landi á þessu ári þá væru hagsmunir kröfuhafa teknir fram fyrir hagsmuni Íslendinga:
Stjórnvöld hafa nú gefið í skyn að hleypa ætti aflandskrónueigendum með eignir sínar úr landi á þessu ári, þvert á þær áætlanir sem hafa skapað trúverðugleika fyrir land og þjóð. Með slíkri stefnubreytingu væru hagsmunir kröfuhafa teknir fram fyrir hagsmuni landsmanna. Hið gagnstæða á ávallt að vera í forgrunni enda er það frumskylda stjórnvalda að standa vörð um hagsmuni Íslands.
