Kvenréttindafélag Íslands hefur kært Alþingi til kærunefndar jafnréttismála á vegna brots á jafnréttislögum við skipan í fjárlaganefnd. Í nefndinni situr ein kona gegn átta körlum. Brynhildur Heiðar- og Ómarsdóttir er framkvæmdarstýra Kvenfélagsins, en hún segir ákvörðun félagsins örþrifaráð:
„ Það er algerlega óásætanlegt og í raun sláandi hvernig skipað er í fastanefndir Alþingis, útfrá kynjasjónarmiðum og jafnréttislögum. Af þeim átta fastanefndum sem starfa innan Alþingis, eru fimm fastanefndir hvers skipan brýtur í bága gegn jafnréttislögum. Við höfum sent frá okkur fjórar ályktanir og áskoranir á þessu ári til þingmanna um að virða jafnréttislög þegar skipað er í nefndir, en í lögunum segir að kynjahlutfall kvenna skuli að minnsta kosti vera 40% Þetta hefur ekki dugað hingað til og því vildum við prófa nýja nálgun,“
segir Brynhildur.
Í tilkynningu frá félaginu segir meðal annars um jafnréttislög:
„Í 15. gr. jafnréttislaga er kveðið skýrt á um að í nefndum, ráðum og stjórnum á vegum ríkis og sveitarfélaga skuli þess gætt að hlutfall kynjanna sé sem jafnast og ekki minna en 40% af hvoru kyni. Skipun Alþingis í fjárlaganefnd fer með grófum hætti gegn lagaákvæðinu, þar sem hlutföllin eru 89% karlar og 11% kona.“
Samkvæmt Brynhildi hallar á konur í öllum nefndum nema einni. Hlufallið endurspegli ekki kynjahlutfallið á Alþingi, en 38% þingheims eru konur, en konur í öllum fastanefndum þingsins eru samtals 36%
Tilkynningu félagsins má lesa hér.