Þetta eru stærstu fréttirnar úr viðskiptalífinu í heiminum. Evrópusambandið og Japan gera risastóran fríverslunarsamning. Hann nær yfir svæði sem nemur 30 prósentum af heimsviðskiptum. Japanir opna meðal annars fyrir matvörur frá Evrópu, Evrópa opnar fyrir japanska bíla og tæknibúnað. Ekki ólíklegt að EFTA geti fylgt í kjölfarið, aðildarríki EES-samningsins.
Með fylgir yfirlýsing Juncker, forseta framkvæmdastjórnar ESB, og Abe, forsætisráðherra, um að þeir aðhyllist frjáls viðskipti í veröldinni. Á vefnum Politico birtist grein af þessu tilefni þar sem segir að Evrópusambandið sé orðið leiðandi í heimsviðskiptunum nú þegar Bandaríkin hafa gefið slíkt hlutverk frá sér.
Á síðustu tveimur árum hefur ESB gert viðskiptasamninga við Vietnam og Kanada. Í uppsiglingu er líka viðskiptasamningur við ríki í Suður-Ameríku.
Það er náttúrlega athyglisvert að Bretland verður fyrir utan þessa samninga þegar Brexit gengur endanlega í garð. Ríkisstjórn Theresu May er í standandi vandræðum vegna Brexit. May dró svokölluð rauð strik vegna Brexit í fyrra – nú virðist eins og hún sé að hörfa bak við þau flestöll.
