„Ég er bara mjög brött fyrir þetta stjórnarsamstarf og ég held þetta geti orðið þjóðinni og samfélaginu öllu til heilla.“
Þetta sagði Katrín Jakobsdóttir formaður Vinstri grænna á blaðamannafundi á Bessastöðum. Katrín er nú með umboð frá forseta Íslands til stjórnarmyndunar. Allar líkur eru á að ný ríkisstjórn verði mynduð á fimmtudag. Ekki er ljóst hvaða þingmenn verða ráðherra en Katrín myndi þó taka við forsætisráðuneytinu.
„Við fórum bara yfir … ég gaf honum skýrslu um stöðu þessara stjórnarmyndunarviðræðna. Það liggur fyrir að stjórnarsáttmáli liggur fyrir í grófum dráttum og hann verður borinn upp undir okkar flokksstofnanir á morgun, miðvikudag. Og þær munu þá taka hann til afgreiðslu. Og það liggur líka fyrir að við formenn flokka sem hafa setið við þetta borð, það er okkar sameiginlega niðurstaða að ég muni fá umboð forseta Íslands og forseti Íslands hefur veitt mér það á þessum fundi.“
Þá sagði Katrín að ætti eftir að koma í ljós hvort allir myndu styðja stjórnarsáttmálann.
„Stjórnarsáttmálinn verður borinn undir okkar flokksráð á morgun í kjölfarið verður þingflokksfundur þar sem við munum síðan ganga með endanlegum hætti þingflokksins á málinu,“ sagði Katrín á blaðamannafundinum. „Þá mun Vg funda með þingmönnum og hlusta eftir þeirra sjónarmiðum áður en tekið verður til formlegrar afgreiðslu.“
Katrín greindi einnig frá því að stjórnarandstöðunni hefði verið boðin formennska í þremur nefndum.
„Stjórnskipunar- og eftirlitsnefnd, umhverfis- og samgöngunefnd og velferðarnefnd. Þau eiga eftir að svara okkur með það hvort þau hyggist þiggja það,“ sagði Katrín og bætti við aðspurð hvort hún teldi að tilboðinu yrði tekið:
„Ég hef tekið mark á því sem þau hafa sagt að þau vilji taka þátt í því að breyta vinnubrögðum á Alþingi þannig ég trúi ekki öðru en að það verði.“
