Sigmundur Davíð Gunnlaugsson formaður Miðflokksins og fyrrverandi forsætisráðherra segir að eina ástæðan fyrir því að Sjálfstæðisflokkurinn, Vinstri græn og Framsóknarflokkurinn séu að mynda ríkisstjórn sé að tryggja forystu flokkanna ráðherrastóla. Vill Sigmundur Davíð meina að það stríði gegn lýðræðinu að mynda breiða ríkisstjórn frá hægri til vinstri þar sem kjósendur séu ekki lengur að kjósa um ákveðna stefnu heldur nú snúist stjórnmálin um ímynd. Hann segir viðtali á Útvarpi Sögu að væntanleg ríkisstjórn Sjálfstæðisflokks, Vinstri grænna og Framsóknarflokks snúist fyrst og fremst um ráðherrastóla:

Sumir sem hafa verið ráðherrar komast aldrei úr því hlutverki og þrá að fá ráðherraembætti meira en nokkuð annað, að fara inn í ráðuneyti, hafa starfsmenn, ráðherrabíl og svo allt sem að þessu fylgir. Þetta er sem sagt stjórn sem er mynduð til þess að vera í nálægð við völd og skipta á milli sín stólunum en ekki stjórn um verkefnin sem menn ætla að vinna þegar þeir eru komnir í stólana.

Sigmundur segir að óformlegar viðræður Vinstri grænna, Samfylkingar, Framsóknar og Pírata hafi aðeins verið sýndarviðræður og að ríkisstjórn VG, Sjálfstæðisflokks og Framsóknar hafi verið á teikniborðinu frá því fyrir kosningar:

Það getur verið að á einhverjum tímapunkti hafi menn farið að ímynda sér að þessar vinstri-viðræður gætu skilað einhverju, þegar menn voru að hittast þarna í sveitinni og borða saman pítsu þá kannski héldu menn að þetta gæti gengið, en svo sneru menn sér aftur að upprunalega planinu sem eru þessi áform sem að ýmsir í Sjálfstæðisflokknum og í Vinstri grænum. Þetta er ekki stór hópur, en nokkrir menn, hafa lengi haft um að ná þessum tveimur flokkum saman í ríkisstjórn.

Segir Sigmundur að nú sé verið að koma þessari ríkisstjórn saman af nauðsyn þar sem Sjálfstæðisflokkurinn hafi fengið sína næstverstu útkomu í kosningum til þessa, Framsóknarflokkurinn sína verstu og Vinstri græn tapað helmingi fylgi síns í könnunum á þremur vikum fyrir kosningar:

Þannig að taparar kosninganna hafa talið þann kostinn vænstan að hnipra sig saman og reyna að slá skjaldborg um það kerfi sem þeim leið vel í, þegar þessir flokkar hefðu 80-85% fylgi samanlagt, nú hangir það rétt yfir 50%.