Èric Lluent Estela skrifar opið bréf til Guðna Th. Jóhannessonar forseta Íslands:

Kæri Guðni,

ég er Katalóni sem bý í Reykjavík. Ég skrifa til þín því ég hef miklar áhyggjur af öryggi íbúa Katalóníu. Eins og þú hefur án efa heyrt þá slösuðust 890 manns í átökum við spænsku lögregluna síðasta sunnudag er fólkið reyndi að greiða atkvæði á kjörstöðum víða í Katalóníu. Ofbeldið sem við urðum vitni af færði okkur 50 ár aftur í tímann. Þjóðaratkvæðagreiðslan var bönnuð af stjórnlagadómstól Spánar en ekkert réttlætir mannréttindabrotin sem voru framin.

Birgitta Jónsdóttir var á staðnum sem alþjóðlegur eftirlitsaðili og varð vitni af harmleiknum sem átti sér stað. Ég veit að hún getur sagt þér hvað gerðist og hversu mikla niðurlægingu Katalónar urðu fyrir þennan dag. Afstaða stjórnvalda í Katalóníu og stjórnvalda á Spáni er á öndverðum meiði og það er stutt í að ástandið í Katalóníu verði mjög hættulegt.

Spænsk stjórnvöld hafa ákveðið að beita valdi, valdbeitingu sem er studd af spænskum lögum með blessun Filippusar VI Spánarkonungs, er það talið eina leiðin til að glíma við „Katalóníuvandamálið“. Á sama tíma eru sífellt fleiri í Katalóníu, frá báðum hliðum, stuðningsmenn sambandsins við Spán sem og aðskilnaðarsinnar, að ganga til liðs við stjórnmálahreyfingar sem styðja þjóðaratkvæðagreiðsluna. Eins og staðan er nú þá er engin lausn í sjónmáli, en vandamál sem eru stjórnmálalegs eðlis þurfa stjórnmálalegar lausnir. Á meðan ástandið er í baklás þá er enginn að tala saman og margar milljónir óttast að átökin stigmagnist í næstu viku.

Ísland er alþjóðlegt viðmið þegar kemur að nútímalegu lýðveldi. Margir í Katalóníu og á Spáni sjá landið þitt sem fyrirmynd, sérstaklega eftir atburðina 2008, stjórnmálaumræðuna sem fór af stað og þátttöku almennings í ákvarðanatökum. Þess vegna, og vegna þess að ég trúi því að þú getir leikið stórt hlutverk á þessum erfiðu tímum í Katalóníu, bið ég þig um að gefa kost á þér sem sáttasemjari á milli stjórnvalda í Katalóníu og stjórnvalda á Spáni.

Yfirlýsing frá þér, við fyrsta tækifæri, getur hjálpað til við að lægja öldurnar og fengið fulltrúa beggja hliða til að setjast niður og ræða möguleikann á þjóðaratkvæðagreiðslu sem báðir aðilar geta sætt sig við. Þitt hlutverk sem forseti Íslands er að tala máli íslenskra borgara. En sem forseti nútímaþjóðar með eitt elsta frum-lýðræðislega þjóðþingið í heiminum gefur þér þann rétt að tala máli nútímalegs lýðræðis sem við viljum öll sjá á 21. öldinni.

Með einlægni, Èric Lluent