„Jæja, ég ætla þá að segja það: Þetta er orðið ógeðslegt. Það er að segja, íslensk ferðaþjónusta, og ég veit það því að ég tek þátt í henni.“

Þetta segir Kristján Jónsson, forstjóri og eigandi ferðaþjónustufyrirtækisins Iceland Discovery, um fréttir undanfarinna daga um óánægju erlendra ferðamanna með þjónustu aðila í íslenskri ferðaþjónustu. Nýjasta dæmið eru hjón sem leitað var að á Langjökli, en þau höfðu orðið viðskila við fyrirtæki sem skipuleggur vélsleðaferðir og hafði lagt á jökulinn þrátt fyrir stormviðvörun. Sögðu ferðamennirnir að þau hefði talið sig vera að deyja og að svipta ætti ferðaþjónustufyrirtækið starfsleyfi sínu.

Kristján segir græðgi ferðaþjónustuaðila vera orðna hömlulausa og ábyrgðarleysið fullkomið.

„Ekki hjá öllum, því fer fjarri, en gikkirnir í veiðistöðinni eru bara of margir og of áberandi. Það er sama hvar fæti er stungið niður: rútur á leið í norðurljósaferð í rigningu, fólki troðið í jöklagöngu í slyddu og aftakaroki, biðraðir við íshella sem eru aukinheldur nær ófærir vegna vatnselgs; hér ríkir algjört gullgrafaraæði og þetta er orðið ógeðslegt,“ segir hann.

„Orðspor Íslands stefnir lóðbeint til helvítis en yfirvöldum málaflokksins er svo slétt sama á meðan allir monnípeningarnir flæða inn,“ segir Kristján ennfremur í færslu á fésbókarsíðu sinni.