Votta þarf fyrirtækin á þriggja ára fresti samkvæmt frumvarpi til laga sem verður það fyrsta sem Þorsteinn Víglundsson, ráðherra félags- og jafnréttismála, leggur fram á Alþingi. Þetta kemur fram á forsíðu Morgunblaðsins í dag. En einsog kemur fram í stjórnarsáttmálanum þá er það stefna ríkisstjórnarinnar að fyrirtækjum með 25 starfsmenn eða fleiri verði gert að votta um jöfn laun milli kynjanna í fyrirtækjum sínum. „Þetta er vissulega íþyngjandi aðgerð, en við teljum hana nauðsynlega. Segir Þorsteinn í Morgunblaðinu. Til stuðnings máli sínu bendir hann á að hlutur kvenna í stjórnum fyrirtækja hafi ekki verið mikill fyrr en stjórnvöld tóku af skarið með lagasetningu. Auk þessa jafnlaunavottunar mun stórum fyrirtækjum verða skylt að koma sér upp jafnréttisáætlun.

Í Morgunblaðinu segir ennfremur:

Sannfæring Þorsteins er að kynbundnum launamun verði ekki útrýmt nema með aðgerðum í hverju fyrirtæki og stofnun fyrir sig. Því geti það verið öflugt verkfæri að fá vottun, sem til dæmis endurskoðunarfyrirtæki hefðu með höndum. Ætla má að það kosti fyrirtæki um hálfa milljón króna að fara í fyrstu úttekt, en sá sem hana annast færi í gegnum upplýsingar um laun, ábyrgð og starfslýsingu hvers og eins. Allt kallar þetta, segir Þorsteinn Víglundsson, á ögun í launasetningu fyrirtækja, sem þurfi að vera gegnsæ og vel skipulögð. Ráðherrann telur jafnframt að innan ekki langs tíma myndist skilningur á nauðsyn vottunar sem muni af stjórnendum fyrirtækja þykja jafn sjálfsögð og að þar sé algengur öryggisbúnaður.

Börkur Gunnarsson tók saman.