Dr. Kári Stefánsson hefur sent Eyjunni svofellt skeyti í tilefni af frétt fyrr í kvöld um viðskipti Íslenskrar erfðagreiningar gegnum fjárfestingaleið Seðlabankans:

Kannski hann ætti að skipta út bjórnum fyrir þorskalýsi — Svar við fésbókarfærslu Sigmundar Davíðs

Bjartur í Sumarhúsum brást ókvæða við þegar kvenfélagið færði honum kú til þess að börn hans fengju mjólk í eymdinni. Það er ekki laust við að það sé svolítill Bjartur í Sigmundi Davíð fyrrverandi forsætisráðherra þegar hann hendir skít í mig fyrir þá staðreynd að Íslensk erfðagreining tók þátt í fjárfestingarleið Seðlabankans á sínum tíma.

Bið ég nú Bjart afsökunar á því að ég skuli líkja honum við þann mann sem fyrir hönd þjóðarinnar samdi við sjálfan sig í hópi kröfuhafa í íslensku bönkunum.

Staðreyndir málsins eru eftirfarandi: Að mati ráðamanna var mikill skortur á erlendum fjárfestingum í íslensku samfélagi. Til þess að bregðast við honum bauðst Seðlabankinn nokkrum sinnum til þess að kaupa erlendan gjaldeyri á mun hærra verði en markaðist af skráðu gengi krónunnar gegn því að krónurnar yrðu fjárfestar í verkefnum á Íslandi sem Seðlabankinn legði blessun sína yfir. Íslensk erfðagreining brást við þessu boði með því að selja Seðlabankanum stórar fjárupphæðir í erlendum gjaldeyri og fjárfesti síðan krónurnar sem hún fékk fyrir þær alfarið í atvinnustarfsemi í Vatnsmýrinni.

Seðlabankinn lýsti ákveðinni þörf í íslensku samfélagi og bauð upp á leið til þess að mæta henni sem Íslensk erfðagreining nýtti sér og íslensku samfélagi.

Þeir tíu milljarðar króna sem Íslensk erfðagreining fjárfesti hér á landi í gegnum þessa leið Seðlabankans eru þó ekki nema í kringum 7% af þeim 150 milljörðum sem fyrirtækið hefur flutt til landsins í erlendum gjaldeyri og fjárfest hérlendis síðan það var stofnað.

Höfundur er forstjóri Íslenskrar erfðagreiningar.